كێشه‌یل هه‌ولێر و به‌غدا وه‌رده‌وامن
وه‌دريژایی ماوه‌ی (11) ساڵ گوزه‌يشته، له‌شوون ڕميان حكوومه‌ت به‌عس، وه‌و جووره‌گ چاودێره‌يل باسی كه‌ن، بڕێگجار چه‌نه ئيسه قه‌یران‌و كێشه‌يل سیاسی ناونی هه‌رێم‌و به‌غدا قويله‌ونه‌وينه‌سه‌و، وه‌گوره‌ی زانیاریه‌گانیش، ئه‌ڕا یه‌كه‌مینجاره مالكی جوور یه‌كه‌م سه‌رۆك وه‌زیر عێراق موچه‌ی هه‌رێم كوردستان بووڕێ.
سه‌رۆك حكوومه‌ت هه‌رێم، وه‌رده‌وام له‌وتارو لێدوانه‌يلی ئويشێ: مكوڕيم له‌بان هه‌نارده‌كردن نه‌فت‌و پاشه‌كشه‌يش له‌و سیاسه‌ته ناكه‌یمن، له‌وه‌رانوه‌ریش ئه‌وه‌گ وه‌دی ئه‌كريه‌ێد، حكومه‌ت به‌غداو وه‌تایبه‌ت مالكی جه‌خت له‌وه كه‌نه‌و وه‌و جوور ئيسه‌ی هه‌نارده‌كردن نه‌فت هه‌رێم قه‌بول نه‌ێرن و بايه‌د وه‌پێاچين ئه‌ڕاێ بكريه‌ێد.
هاوڵاتیه‌یل هه‌رێم كوردستان، له‌و ناوبه‌ينه ڕأێ خوه‌یان دێرن، وه‌لای ئه‌وانه‌و ڕێككه‌فتنه‌گان هه‌رجوورێگ بوود گرنگیيگ ئه‌وتۆ نه‌ێرێ، چه‌نه ئه‌وه‌گ خوازن كێشه‌گان بنريه‌نه لا‌و سه‌رئه‌نجام بژێوی ژیان‌و موچه‌يلیان ئه‌ڕاێان فه‌راهه‌م بكريه‌ێد، به‌ش فره‌ێگ له‌ڕووژنامه‌نويسه‌يل و چالاكه‌یل بوار ماف مرۆڤيش ئاماژه وه‌وه‌‌كه‌ن، كێشه‌گان هه‌رچه‌نيگ فره‌و گه‌ورا‌تربوون، ناكريه‌ێد كار بڕه‌سێده ئه‌وه‌گ موچه‌ی هاوڵاتیه‌يل بكريه‌ێده قوربانی ئه‌و ململانیه‌يله‌و بايه‌د هێز و لايه‌نه‌يل له‌جياتی بڕین موچه‌ی مه‌ردم، په‌نا ئه‌ڕا فشارو میكانیزمیگ تر بوه‌ن، له‌یه‌كه‌مین مانايه‌يل بڕین موچه‌ی فه‌رمانبه‌ره‌یل هه‌رێم، بێجگه له‌ژێرپاخستن یاسا‌و ده‌ستور‌و بنه‌مايه‌يل مرۆيی، هویچ مانا‌و ئاماژه‌یگ تر هه‌ڵناگرێ.
سه‌رچه‌وه‌یل هه‌واڵ ئاماژه وه‌وه‌كردنه، حكوومه‌ت هه‌رێم‌و به‌غدا ڕه‌سينه‌سه جوورێگ له‌ڕێككه‌فتن‌و ملله‌ت هه‌رێم ئاگاداركردنه‌سه‌و، له‌ماوه‌یگ نزیك له‌باره‌ی پرس موچه، چه‌وه‌ڕێ مزگانی خوه‌ش بوون، وه‌لێ ئه‌و جووره هه‌واڵه‌يله فره دريژه نه‌كيشان و دوياتر، (سه‌فین دزه‌یی) قسيه‌كه‌ر فه‌رمی حكومه‌ت هه‌رێم كوردستان، ڕه‌دیه‌وكرد وه‌ل حكومه‌ت به‌غدا هویچ جووره ڕێككه‌فتنێگ ئه‌نجام داوين، به‌ڵكو ته‌نيا چه‌وه‌ڕێ جوواو حكومه‌ت به‌غدا كه‌ن.
ا. ج
