شاولين كۆنغ فۆ له چين ئه‌را سلێمانی
بورهان كامل محه‌مه‌د مه‌شقده‌ر شانازی وه خوه‌يه‌و ئه‌كا ك ته‌نيا كه‌سيگه له سلێمانی مه‌شق جايه‌ڵ جوانه‌يل ئه‌ياد له‌بان جموجويل شاولين كۆنغ فۆ.
محه‌مه‌د ته‌مه‌ن ٣٣ ساڵان هه‌ر له مناڵييه‌و ئه‌و وه‌رزشه يای گرتگه‌و خوه‌ی هووكاره‌ی مه‌شقه‌يل بنه‌ڕه‌تی كردگه وه‌رجه ئه‌وه‌گ په‌يوه‌ندی بكاده ناوه‌ند هونه‌ره‌يل وه‌رگری جه‌نگی له شاره‌گه و ئه‌را ماوه‌ی ٧ ساڵ له وڵات چين مه‌شق كردگه له‌بان ده‌س مه‌شقده‌ره‌يل ئه‌و وازيه‌و باوه‌ڕنامه‌ی دبلۆم له‌تی وه‌ده‌سهاوردگه.
محه‌مه‌د هه‌نای له چين گله‌و خوارد له‌ساڵ ٢٠٠٨ بنگه‌يگ واز كرد وه ئامانج باڵاوكردن و ئاڵشت وئوڵوشت هونه‌ر وه‌رزشی ك جايه‌ڵه‌يل فريه‌يگ كيشاسه خوه‌ی وه بوونه‌ی ئشقيان ئه‌را ئاساره‌يل سينه‌مايی ئه‌و وازيه.
محه‌مه‌ود ئويشێد ئه‌يه ته‌نيا ناوه‌نديگه ك تايبه‌ته وه‌ی وه‌رزشه له كوردستان و عراق و جه‌هان عه‌ره‌بی و منيش ته‌نيا كه‌سيگم باوه‌ڕنامه‌ی دبلۆم له‌ی هونه‌ره له چين وه‌رگرتمه‌و يه‌كه‌مين كوردم ده‌رس ئی هونه‌ره له چين خوه‌نستمه‌و ئی هونه‌ره جياوازه له هونه‌ره‌يل تر و لايه‌نگره‌يل فريه‌يگ ديرێد و ئاساره‌يل سينه‌مايی جوور بروسلی و جاكی شان و جيت لی گرته‌سه خوه‌ی و ئيسه‌يش جايه‌ڵه‌يل وه بوونه‌ی خوه‌شه‌ويسييان ئه‌را ئی هونه‌ره له‌يوا وه‌پيم كرد ئی ناوه‌نده واز بكه‌م.
مه‌شقده‌ر شاولين كۆنغ فۆ وت: ده‌يه‌ها هه‌زار خوه‌ندكار له‌ی ناوه‌نده مه‌شق كردنه‌و له‌تی ته‌خه‌ڕوج كردنه‌و ئيسه‌يش نزيكه‌ی فيشتر له ١٤٠٠ خوه‌ندكار له كوڕ و دويه‌ت ديريم مه‌شق له‌تی ئه‌كه‌ن.
ئی ناوه‌ند هونه‌ريه جوور ئه‌وه‌گ خاوه‌نه‌گه‌ی باسی له‌لی ئه‌كا هه‌نای ك پشتگيری نه‌كريه‌ێد له هه‌ر لايه‌نيگه‌و له هساو تايبه‌ت خوه‌ی كاره‌يلی وه‌ڕی ئه‌خاد وه‌بی قانجاز.
ته‌مه‌ن ئه‌و خوه‌ندكاره‌يله ك مه‌شق له‌ی ناوه‌نده ئه‌كه‌ن ها ناونی ٤ تا ٦٠ ساڵ، وه‌ل ئه‌وه‌يشا چوار وه‌جبه له رووژيگ كار ئه‌كاو دو خوليش ديرێد له هه‌فته‌يگ ئه‌را هه‌ر ئاستيگ.
هه‌ر خوه‌ندكاريگ ك خوازياره له‌تی ناونويس خوه‌ی بكا بايه‌سه ٥٠ هه‌زار دينار عراقی بيه‌ێد ك ئه‌كاده نزيكه‌ی ٤٠ دۆلار له مانگيگ بيجگه ٣٠ هه‌زار دينار تر ئه‌را جنگ و كه‌وشه‌يل مه‌شقكردن.
محه‌مه‌د هه‌ميش وت: له‌وه‌ر ئه‌وه‌گ ئی هونه‌ره چينيه خواست ئه‌وه‌سه چه‌ك و كه‌ره‌سه‌و جنگه‌يل تايبه‌ت وه‌خوه‌ی داشتوود و يه‌يش له ئيران و توركيا يا ده‌وڵه‌ته‌يل هاوسا ده‌س ناكه‌فێد و هه‌ر وه‌و خاتريشه بايه‌سه له چين بارمه‌يان و سه‌ه‌تايش فريه سه‌خت بوی له‌بانم چوينگه هه‌وه‌جه وه پويل فريه‌يگ كرد، وه‌لی وه‌ل ئه‌وه‌يشا سه‌ركه‌فتم له فراوانكردن ناوه‌نده‌گه وه دريژايی ساڵه‌يل و وه‌بی هويچ ده‌سميه‌تيگ له هه‌ر لايه‌نيگ چ جوور ليژنه‌ی ئۆڵه‌مپی يا حكومه‌ت كوردستان و ته‌نانه‌ت جارجاريگ ناچار بويمه چشته‌يل گرانقيمه‌ت خوه‌م بفرووشم له‌وه‌ر دابينكردن پويل ئه‌را ته‌مويلكردن ناوه‌نده‌گه.
باسووز يه‌كيگه له‌و كه‌سه‌يله ك مه‌شق ئه‌كه‌ن له‌ناو ئی ناوه‌نده و وت: من قانجاز فريه‌يگ كردمه له‌ڕووی لاشه‌يی و ده‌روينيه‌و له‌ی مه‌شقه.
باسووز هه‌ميش وت: ئه‌را ماوه‌ی ساڵ و نيميگه مه‌شق ئی هونه‌ر شاولين كلاسيكيه ئه‌كه‌م، ئی خوه‌ندنگا وه‌ڕاسی جياوازه له خوه‌ندنگايه‌يل تر، هونه‌ر شاولين سه‌خته وه‌تايبه‌ت ئه‌را ئافره‌ته‌يل، وه‌لێ له هه‌مان وه‌خت قانجاز فريه‌يگيش ديرێد له‌ڕوی لاشه‌يی و ده‌روينی.
په‌رسگای شاولين ك وه‌رجه ١٥٠٠ دامه‌زرياگه په‌رسگايگ فه‌رميه ئه‌را خوه‌ندنگای شاولين ك ده‌رس بوزيه‌ت ئه‌ياد تا رووژ ئمڕوو.
جی باسه، مه‌شق و جموجويل شاولين كۆنغ فۆ ك ناسرياگه وه‌ناو شاولين بووزی له په‌رسگای شاولين له هه‌رێم خه‌نان له چين په‌ره وه‌پی درياو شاولين كۆنغ فۆ بويه يه‌كيگ له گه‌وراترين خوه‌ندنگايه‌يل كۆنغ فۆ له‌سای جموجويله‌يلی و مێژووه‌گه‌ی ك ئه‌چێده‌و ئه‌را فيشتر له ١٥٠٠ ساڵ.
