شەفەق نیوز/ بەرپرسەیل و هاوڵاتیەیل لە قەزای خانەقین، هاوارەیلیگ ئەرا حکومەت فیدڕاڵی و دەسڵاتە ئەمنیەگان به‌رزه‌و کردن، ئەرا رزگارکردن قەزاگە لە دڕندەترین پەلامارەیل تیرۆرستیانە لە ساڵ ٢٠٠٣ تا ئیسە و داوای چارەیسەریگ خێرا ئەرا پەلامارەیل و رویداوەیل کردن ک زیان وە مەردم و ماڵەیلیان دەێد.
قەزای خانەقین بەرزەوبوینەگ لە رێژەیل په‌لاماره‌ ئەمنیەگان دوینێد، ک بویسە کار روژانە، دویای کیشانەوەی پێشمەرگە له‌ ساڵ ٢٠١٧ ، ک کۆنتڕۆڵ ئەمنی تەواوی ئەو ناوچەیلە کردوید.
خراوترین کارەساتەیل ئەمنی لە ٢٠٠٣ وه‌
دلێر حەسەن سایە، قایمقام خانەقین، باس لە رەوش ئەمنی دەوروبەر خانەقین کەێد، وە (خراوترین) لە ساڵ ٢٠٠٣ یەو، وهوشداری لە ئەگەر کاەرساتیەیل ئەمنیگتر دا ئەگەر چارەسەر رەوشەگە وەیەکجاری نەکریەێد، ومتمانەی خەڵکەگە وە دەزگا ئەمنیەیلە نەدریەێد.
سایە لە قسەگەی ئەرا ئاژانس شەفەق نیوز وت؛ هۆکاریەیل خراوبوین ئەمنی وزیایبوین کارەیل توندوتیژی لە دەورگرد خانەقین تیەێدەو ئەرا شوینە جوگڕافیە گەوراگە ک داعش لەناوی جموجویل کەێد، بیجگە دوڕیانەیل ورووبارەیل چواردەوری، ک تیرۆرستەیل کردنەی لانەی حەشار خوەیان، لەبان یەیش لاوازی به‌ش هەواڵگیریه‌.
سایە وتیش؛ دانیشتوەیل دەورگرد خانەقین هانە ناو رەوش ترسناک دەروینییگ، وەگەرد مەترسییان لە فەوتانن سەرچەوەی خواردنو ژیانیان وە مه‌سه‌له‌ی ئاگردان له‌ خەلەیل گەنم لە لاین ریخریاگەیل تیرۆرست و یا خراوەکارە. ئاماژە دا ک خەڵک خانەقین ئەوەسا وەهەڵوێستیگ هەڵسن وەل فەرماندە ئەمنیەگان، ئەرا وسانن خوین رشانن و روژانە لە قەزاگە وناوچەیلەگەی كه‌فنه‌شوون تەرمەیل.
زیاتر لە ٢٠ ئاوای هانە ژیر هەڕەشەی ئاوارەبوین
محمد ئەمین زەنگەنە یەکیگە لە کشاورزەیل ئاوای موبارەک سەروە قەزای خانەقین، هوشداری دەێد لە کۆچکردن مه‌ردم دەیان ئاوایی وەرەو ناوچەیل گەرمیان،ئه‌را نه‌جات لەدەس پەلامارەیل تیرۆرستی، وئی جەنگ ژیانە ک هەمیشە هەڕەشەیان دەێد، وتیش ئەیە ک لەخانەقین رویدەێد لەی ماوەی چەن ساڵە لەی ناوچەیلە وێنەی نەویە.
زەنگەنە لە قسەگەی ئەرا ئاژانس شەفەق نیوز دووپات کەرد ک ئەگەرەیل کۆچکردن تەنیا لەلای ئاوایە کوردەیلە نیە، بەڵکم دەیان لە ئاوایە عەرەوەیلەیش هانە نزیک کۆچکردن وەبونەی پەلامارەیل وەردەوامی و کارەیل رفانن ک کەفنە روی کشاوەرزەیل.
و لە باوه‌ت هەژمار ئاوایەیل ک تیرۆریسته‌یل پەلامارەیان دانه‌، زەنگەنە ئویشێد؛ زیاتر لە٢٠ ئاوای لە دەورگرد خانەقین هانە ژیر هەڕەشەی کۆچکردن وەرەو ناوچەیلیگتر، لە ترس تیرۆرستەیل.
داواکاریەیل وەهاتنەوەی پێشمەرگە
لای خویەو سەمیر محمد نور بەرپرس ئەنجومەن خانەقین، ئاماژە دەێد ک خەڵک خانەقین وئاوایەگانی داوای هاتنەوەی پێشمەرگە ئەرا دەورگرد خانەقین کەن، ئه‌را پڕەوکردن ناوچە گومابویە ئەمنیەگان لە ناوبەین خانەقین وسنور گەرمیان.
نور هەمیش وت؛ دووارە وڵاوەبوین پێشمەرگە وەل هێزەیل سوپا لە دابەش کردن دەسڵاتە ئەمنیەگان، مەترسی تیرۆرستەیلە وەیەکجاری لەناوبەید.
موسەنا تمیمی، پارێزگەر دیالە، دویەکە جومعە،لە قسەگەی ئەرا ئاژانس شەفەق نیوز باس لە بەرزوەبوین پەلامارەیل تیرۆرستەیل کرد، لە بڕیگ ناوچەیل پارێزگاگە، ک هۆکارەیلی ئەوەسە پلانیگ گونجیاگ نیە، ودیاری دەسڵاتەیل نەکریاگە لە ناوبەین دەزگا ئەمنیەگان وهێزەیل پێشمەرگە، لە ناوچەیل هاوسنور ناوبەین دیالە و هەرێم کوردستان، ودیالەو سەلاحەدین له‌ لایه‌ن ده‌زگا هاوبه‌شه‌گان.