بۆتين: رويداگه‌يل خوه‌رهه‌ڵات ناوين له‌ئاكام نه‌گونجيان ره‌گه‌زى و ئايينى و سياسيه
بۆتين له دانيشتن يانه‌ى فالداى ناوده‌وڵه‌تى له سوتشى ك(شه‌فه‌ق نيوز)ئاگادارى بوى، باس له‌وه كرد و وت: ئه‌خوازم بزانم جياوازيى ناونى خاس وخراو داعش چه‌س؟ چوينكه وه قسه‌ى بڕيگ له شاره‌زايه‌يل خاسه‌يليان ئه‌وه‌سه ك خه‌ريك سه‌ربڕين قوربانيه‌يليانن وه شيوه‌يگ وه‌رده‌وام.
بۆتين جه‌خت له‌بان ئه‌وه‌يش كرد و وت: كومه‌ڵگاى ناوده‌وڵه‌تى بايه‌سه ئه‌وه بزانێد ك ريكخرياگ داعش وه گشت جووريليه‌و دوشمن ژيار ئنسانى و رووشنهويرى جه‌هانيه.
بۆتين له‌باوه‌ت ديداريشى وه‌ل به‌شار ئه‌سه‌د سه‌رۆك سوورى ك له مۆسكۆ ئه‌نجام دريا وه‌رجه روژه‌يليگ، وت: ئه‌سه‌د قه‌ناعه‌ت كردگه ئه‌را ئه‌نجامداين دانيشتن و گفتگوو وه‌ل هيزه‌يل ئۆپۆزسيۆن ئه‌را چاره‌سه‌ر قه‌يرانه‌گه.
سه‌رۆك رووسى ئاماژه وه‌يه‌يش كرد و وت: بايه‌سه له‌بان سووريه‌يل بڕيار چاره‌نويس خوه‌يان بيه‌ن نه‌ك له‌ژير هويچ فشاريگ، به‌ڵكوو وه لايه‌نگرى كومه‌ڵگاى ناوده‌وڵه‌تى و هه‌ميش وت: پرووسه‌ى رووسى و په‌لاماره‌يلى ئه‌را بان ترۆريسته‌يل له‌وه‌ر خاتر به‌رپاكردن ئاشتيه.
وه‌ل ئه‌وه‌يشا بۆتين باس له‌وه‌يش كرد ك ته‌نيا ئامانجيگ له‌و كرده‌وه‌يل سه‌ربازيه ك مۆسكۆ ئه‌نجامى ئه‌ياد له سوريا وه‌خاتر په‌ياكردن ئاشتى و سه‌قامگيريه له‌و وڵاته.
ئمجا يه‌يش خسته وه‌ر باس ك دوياى داواكارى ده‌سڵاته‌يل فه‌رمى سوورى ئه‌را پيشكه‌شكردن پشتگيرى، بريار له‌باوه‌ت ده‌سوه‌پيكردن په‌لاماره‌يل سه‌ربازى رووسى درياگه له‌ى وڵاته و باوه‌ڕيشى ئه‌وه‌سه ك مه‌شقه‌يل سه‌ربازى رووسى كرگه‌رى خاسيگ ئه‌كاده بان بار سوريا و ده‌سميه‌تى ئه‌ياد ئه‌را سه‌قامگيرى و خاسه‌وكردن بار سياسى له‌تى.
بۆتين له‌باوه‌ت ريككه‌فتن ته‌ياره‌يل رووسييش وه‌ل سوپاى سوورى ئه‌وه ده‌رخست ك ئى ريككه‌فتنه ئاكامه‌يل خاسيگ له‌لى ئه‌كه‌فێده‌و، وه‌تايبه‌ت سيناريۆى دابه‌شكردن سوريا ك ئه‌گه‌ر وه ڕاسى ئه‌نجام بگرێد ئه‌دێده مايه‌ى به‌رپابوين جه‌نگيگ له كۆنترۆڵ ده‌رئه‌چێد.
له‌باوه‌ت ته‌ياره‌وانه‌يل رووسيش ك به‌شدارى له پرووسه‌ى ئاسمانى ئه‌كه‌ن له سوريا، وت: ئه‌و ته‌ياره‌وانه‌يله وه ئه‌نجامداين ئه‌و كرده‌وه‌يل په‌لامارداينه ئه‌را بان ريكخرياگه‌يل ترۆريستى نه‌ك هه‌ر ته‌نيا وه‌رگرى له به‌رژه‌وه‌ندى ملله‌ت سوورى، به‌ڵكوو وه پله‌ى يه‌كه‌م مقه‌يه‌تى له به‌رژه‌وه‌نديه‌يل رووسياو ملله‌ت رووسييش ئه‌كه‌ن.
بيجگه ئه‌وه‌يش، بۆتين جه‌خت له‌وه‌يش كردو وت: ئه‌گه‌ره‌يل رويداين كرده‌وه‌يل ترۆريستى له‌بان خاكه‌يل سوريا نه به‌رزه‌و ئه‌دێ و نه‌يش كه‌مه‌و ئه‌دێ، ك هه‌رچه‌نى ته‌ياره‌يل جه‌نگى رووسييش له ئاسمانه‌يل سوورى خه‌ريك په‌لامارداينن.
له مه‌سه‌له‌ى عراقيش، بۆتين ئاشكراى ئه‌وه‌يش كرد ك مۆسكۆ چه‌وه‌ڕى ئه‌وه كردگه عراق وه فه‌رمى داواى ده‌سميه‌ت له‌لى بكا وه‌خاتر ئه‌نجامداين په‌لاماره‌يل ئاسمانى دژ ريكخرياگ ترۆريستى داعش له‌بان خاك عراق.
سه‌رۆك روسيا هه‌وڵه‌يل دوباره دامه‌زراننه‌وه‌ى خوه‌رهه‌ڵات ناوينيش وه شيوه‌يگ وه‌رده‌وام جوور ناپاڵيگ تاريف كرد ك ته‌قيه‌سه‌و له ناوچه‌گه.
هه‌ر وه‌و خاتريشه بۆتين وت: ئه‌وه‌گ ئمڕوو هاته‌سه تويش خوه‌رهه‌ڵات ناوين، مه‌سه‌له‌ى كه‌ڵه‌كه‌بوين ناكوويه‌يل ره‌گه‌زى و ئايينى و سياسى و كيشه‌يل كومه‌ڵايه‌تى تيژيگه وه دريژايى ده‌يه‌ها ساڵ و بگر سه‌ده‌يليگ و هه‌ر له‌وه‌ر ئه‌وه‌يش هه‌وڵ بنياتنانه‌وه‌ى ناوچه‌گه له ده‌يشته‌و له‌ڕى چه‌سپانن ئيراده ته‌قينه‌وه‌ى راسكانييگ له‌لى كه‌فته‌وه‌و هه‌يكه‌ڵ ده‌وڵه‌ته‌يليگ ويران كردگه‌و مه‌ترسى ترۆريس زياى كردگه‌و دوياخريش له ئاكام ئى ناكووكيه‌يله كيشمه‌كيش روى ئه‌ياد له‌ناونى گشت وڵاته‌يل جه‌هان.
