ئمجا وه‌ل علمانی و ئسلاميه‌گه‌يش مه‌سه‌له‌ی نه‌ته‌وه‌يی زاڵه‌و چه‌تر گرده‌وكه‌ريانه‌و پايه‌و مه‌يدان سياسی وڵاته‌گه‌يش كه‌فته‌سه ناونيان .
ئمجا ئه‌و مه‌سه‌له ك توايم ئشاره‌ت وه‌پی بكه‌يم ، ئه‌ويش كاريگه‌ری سێ كوچگه‌ی علمانی – ئسلامی – نه‌ته‌وه‌ييه ئه‌را ناو كوومه‌ڵگای توركيا و به‌سيانی وه په‌لكيشكردن تاك ئه‌را بان خه‌ت ئه‌و سستمه‌يله ، ك ئه‌ويش له‌ڕيگه‌ی پارت و لايه‌نه‌يله‌وه‌و له‌وه‌رخاتر ده‌نگ زياتر له‌وه‌خته‌يل هه‌ڵوژاردن ، وه‌لی خه‌ت سه‌ره‌كی مه‌سه‌له‌ی نه‌ته‌وه‌ييه ك له‌بان گشت پايه‌يل توركيا ره‌نگه‌و ده‌يگ . ئه‌را نموونه : ئاڵا ياپه‌رچه‌م له‌ناو گشت توركيا مه‌سه‌له‌ی دووسداشتنی گرنگ يا موهمه له‌لايان . له‌لايگ تريشه‌وه هه‌ر تاكيگ تورك بگر خوه‌ی وه قه‌رزار كه‌مال ئه‌تاتورك زانيگ و ، وه‌جووريگ كار ئه‌را ئه‌وه كرياگه ك ئه‌و ده‌ستووره ئه‌و ئه‌را وڵاتگه‌ی داناسه‌ی مقه‌يه‌تيكرياگ بووگ ، بيجگه ئه‌وه‌يش كاريگ له‌يوا كرياگه ك ئه‌تاتورك و كار و سياسه‌ت و تاريخه‌گه وه‌ئه‌مانه‌ته‌وه بدريه‌يگه ده‌س نه‌وه‌يل و هويچ وه‌ختيگ ريگه‌ی ئه‌وه نه‌دريه‌يگ له‌هوير تاكه‌يل كاڵه‌و بووگ و له‌گشت شوون و ناوچه‌يگ له‌و وڵاته‌و له‌سه‌نته‌رو له‌شوونه‌يل گشتی وه ڕه‌سم و په‌يكه‌ر هه‌ميشه ئه‌تاتورك ئاده‌يی يا حزوور ديريگ . وه‌گشتی تويه‌نيم بويشيم خوه‌شه‌ويسی ئه‌را په‌رچه‌م و سه‌ركرده له‌و وڵاته چشت چه‌سپياگيگه له‌هوير تاكه‌يل كوومه‌ڵگا ، له‌وه‌ر ئه‌وه چه‌رچه‌م ئه‌وه‌نه پيرووزه وه‌لايانه‌وه ك له‌پاڵ ناونيشان هه‌ر رووژنامه‌و گووڤاريگيانه‌وه په‌رچه‌ميگ توركی هه‌س ، وه‌ل ئه‌وه‌يشا تائيسه‌يش هويچكام له‌و رووژنامه‌و گووڤاره‌يله حاشا نه‌كردنه‌و داوای ئه‌وه نه‌كردنه ئه‌و په‌رچه‌مه لاوه‌ن ، له‌هه‌مان وه‌خت هويچ رووژنامه‌يگيش ره‌خنه‌يگ له رووژنامه‌يگ تر نه‌گرتگه وه ئه‌وه‌ك په‌رچه‌م توركيا يا په‌رچه‌م تايبه‌ت حزب له‌قه‌ی رووژنامه‌گه‌وه وجوود ديريگ و نيشانه‌ی حكوومه‌ته ، ئمجا ئايا ئه‌گه‌ر ئی نموونه پيشنيار بكريه‌يگ ئه‌را رووژنامه‌و گووڤاره‌يل كوردستان بايه‌سه چ گرفتيگ دروس بكه‌يگ و چوين ره‌خنه له‌يه‌كتری بگرن ؟
مه‌سه‌له‌ی ئسلام له ده‌وڵه‌ت علمانييش شوون خوه‌ی كرده‌سه‌وه‌و نه‌تويه‌نستگه شوون وه توركيای علمانی له‌ق بكه‌يگ ، ك هه‌رچه‌نی به‌رز ونزمی له حوكمڕانی و كار سياسه‌ت هه‌س له‌ناونيان ، وه‌لی كار له‌بان كوشاننه‌وه‌ی نه‌كرياگه ، چوينكه كوومه‌ڵگا شوون گشتيان كرده‌سه‌وه وه‌و مه‌رجه كاره‌گه له خزمه‌ت گشتی بووگ ، ئمجا ئه‌گه‌ر بايگ و له نموونه‌ی ئه‌سته‌مبوڵه‌وه ته‌ماشای توركيا بكريه‌يگ ، ئه‌وه له ڕوی علمانی و كوومه‌ڵگای مه‌ده‌نی و ئازادی رووژنامه‌گه‌ری و ئازادی تاك و كار ره‌سميگ نيشان ده‌يگ ك هويچ وه‌ختيگ سيمای ئسلامی وه‌پيه‌وه نه‌ويه ، ئه‌گه‌ريش له‌ڕوی ئسلاميه‌وه ته‌ماشای هه‌مان شار بكريه‌يگ ، ئه‌وه باوه‌ڕ نيه‌كه‌يد علمانی شوونی بووگه‌وه .
