وه‌ڕاسی كاكه عماد جوانه‌مه‌رگم گوڵیگ نازك و تازه ده‌م بوی؛ وه‌بی ئه‌وه‌گ داڵگ و باوگ و خوه‌شك و براگانی و ته‌نانه‌ت هاوڕيه‌یه‌یل تیر بووی بكه‌ن و دڵیان وه‌پی ئارامه‌و بوود هیشتمانه جی تا شار وادی سه‌لام بڕازینگه‌و و ئیمه‌یش له خه‌م و په‌ژاره بیلیگه جی.
هیمانی بزه خه‌نه‌و هات وچووه ئارامه‌گان عماد جوانه‌مه‌رگم هاله وه‌رچه‌وم و باوه‌ڕ نیه‌كه‌م ئه‌را هه‌میشه بار سه‌فه‌ر به‌ساگه‌و وه‌ره‌و شار غوربه‌ت چوود.
كاكه عماد جاریگ زوی بوی ك له‌لیمان جیاوه بوید؛ نیه‌زانم دڵد له‌لیمان ڕه‌نجیا یا خوه‌د ئاره‌زووی سه‌فه‌ر هه‌میشه‌یی كردی تا ته‌نیا خاترات و یادگاریه‌گاند ئه‌رامان بمینیگه جی و بكه‌فیمه یاد سه‌نگه‌ره چوڵه‌گه‌د...
ئاخر ئه‌را بایه‌د دار گوڵه‌یل وه‌نه‌ونه‌مامی وه‌پاوه هشكه‌و بوون؟
نیه‌زانم..!
هه‌رچی كه‌م خه‌م هجران عماد جوانه‌مه‌رگ و ئه‌سر چه‌وه‌یلم و ده‌سه‌یل له‌رزوكم نیه‌یلنه‌م ك لاوه لاوه ئه‌را كوڕه شرینه‌گه‌ی خاڵو مه‌جید بكه‌م و جوانترین وشه‌یل ئه‌را سه‌ره‌خوه‌شیه‌گه‌د وه‌كار بوه‌م. ئاخر چوین له‌یره‌و دویا بنووڕمه تفه‌نگه ئالوده وه‌خوین و جنگه كوت كوته‌گه‌د كاك عماد...؟ چوین بنوڕمه سه‌نگه‌ره خویناوی و چوڵه‌گه‌د برا ئه‌زیزه‌گه‌م..؟
نیه‌زانم..!
هه‌رچی كه‌م ئارامی به‌مه دڵه نازگه‌گه‌م، وه‌لی حه‌سره‌ت و په‌ژاره ئوقره له‌لیم بڕینه‌و جوور داڵگ كورپه له‌ده‌س چگ ئه‌راد خه‌مینم برا شرینه‌گه‌م...!
چه‌بكه‌م؟ یه قه‌ده‌ر ئیلاهیه زویتر ماڵئاوایی له‌لیمان كردی و قه‌ده‌ر موڵه‌ت وه‌پیمان نه‌یا ك له‌یه زیاتر هاوكار وهاوده‌م و هاوخه‌م یه‌كتری بویمن؛ وه‌ڕاسی شوونه‌گه‌د خالیه و نوڕمه ڕه‌نگ زه‌رد هاوكاره‌یلد و لیوه‌یل بارگردگیان منیش خوه‌م نیه‌گرم و وه‌ل خوه‌ما موور ئه‌راد تیه‌رم تا شایه‌د كه‌میگ دڵه شكیایه‌گه‌م ئارام بگری و هه‌رچی هاواركه‌م كاكه عماد چه‌ویلد واز و ئاخرین وه‌سیه‌ت ئه‌رام بویش..!
وه‌لی چمانی عماد ، عماد جاران نیه‌و چیه‌سه خه‌ویگ قویل هه‌تا هه‌تایی و یه‌كجاری هیلیگه‌مانه جی!!!
ئه‌زیزه‌گه‌م...! تو كوچ كردی و دڵه‌یلمان ئه‌را هه‌میشه تازیه‌بار كردی ؛ بچوو سه‌فه‌ر وه‌خه‌یر و ماڵد ئاواو گه‌ردند ئازا.
*جی باسه، جوانه‌مه‌رگ عماد مه‌جيد شيرعه‌لی ، پاسه‌وانيگ دڵسووز و وه‌فادار ده‌زگای شه‌فه‌ق بوی، ك له سه‌عات 12:05ی نيمه‌ڕوو ڕووژ چوارشه‌ممه 26/5/2010، وه ڕويداگيگ دڵته‌زن، وه‌ناوه‌خت ماڵئاوايی له كه‌سوكار و هاوكاره‌يلی له ده‌زگای شه‌فه‌ق كرد و ئه‌را هه‌ميشه ماڵئاوايی له دونيای فانی كرد.
