هەرچەن گەل ئەمرکای لاتینی کەفتنە ناوین دوزەق ریژیمەیل ستەمكار وبەهەیشت جویلەی کۆمەڵایەتی کە هەناسەی داهێنان کیشێد، بەڵکم وە هەست سادەیی خوەیان هەمیشە ئازادی پەیاکەن، ئەو ئازادیە ک وزەی داهێنان لەناخیان ئەوزەڵ کەێد، خوسێە کویزۆکالا ئی مناڵ بیرۆفی ١٤ ساڵانە لەی هەست کۆمەڵایەتیە وەرگرد، ودەس کردە دروسکردن بانکیگ هاوکاری ئەرا خوەنەوارەیل لە منال و گەنج وڵاتەگەی، ناوی نا بانک ژینگە، ک لە تەمەن دە ساڵان دایمەزران.
جیرۆکەگە وەختا خوزێە دی فرەی لە هاوڕیەگانی پویل خەرج کەن وهویچ لەلی هەڵنێگرن دەسکردەپی ، چوینکە خوەی وە گرنگی پویل زانێد، دەسکردە پڕۆژەی بانکیگ راستەقینە لە پیرۆ ، هەرچە هاوڕیگانی پاشەکەوت کردیان روانەی ئه‌کرد ئەرا بانکەگەی وخوەی کارت وەخشین وەرگرد، وکارت ئەرایان پەیا کرد، تا وەپی لە ری بانکەیل ئامێره‌یل پویل هه‌روه‌خت توان هەڵیبگرن و لە ری توڕ داراییەگە رەوانەی دامەزراوه‌ بازرگانیەگان بکەن، ک ئەرایان دروس کریا. وەیجوورە بویە یەکەمین بانک لەجهان ک مناڵیگ دامەزرنێدەی، وبانکەگە بویە خاوەن ناو وەناوبانگیگ لە پیرۆ، ک کڕیارەیلی رەسینە ٣٠٠٠ کەس، وئیسە ٨ فەرمانبەر ك تەمەنیان لەخوەی گەوراتره‌ لەناوی کارکەن.
بانکەگە سیستمیگ دانا ئەرا هاوکاری مناڵەیل لە قانجاز کردن پویل، لە ری دووارە وەکارهاوردن بوتڵەیل پلاستیک، تا بچنە بانکەگە وهەرچە بوتڵ پلاستیک دیرن بیەنە پی، وەرانوەر پویلیگ ئەرایان داوەزێدە بانکەگە، ئەوە ک وەپی خەڵات كه‌شوهەوای مناڵەیل وەرگرد، لەلایەن کۆمپانیای وزەی تێلجا.