شه‌فه‌ق نيوز/ دوياى چه‌ن رووژيگ له‌ رفاننى له‌وه‌رده‌م ماڵه‌گه‌ى له‌ به‌غدا له‌لايه‌ن كه‌سه‌يليگ نه‌ناسرياێ له‌ئه‌نجام هاتنه‌وه‌ى له‌ خوه‌ينيشانداينه‌يل، زه‌يد خه‌فاجى وێنه‌گر رووژنامه‌نويس ئازاد كريا.

ئمڕوو ده‌مه‌و شه‌وه‌كى باوگ زه‌يد له‌ ماڵپه‌ڕ كۆمه‌ڵايه‌تى فه‌يسبوك نويساگه‌: زه‌يد هاته‌و، چه‌نه‌ دونيا سوپاس ئه‌را گشت مه‌ردم له‌ مامه‌و خاڵوو و قه‌وم وخيش و دووس و هاوساو هه‌رگه‌سيگ وه‌لمانا وسيا وه‌ وشه‌يگ و وه‌ دوعا، ك نازانم چوين تاريف ئحساسم بكه‌م ئه‌رادان، گشت ئه‌يه‌ قه‌رزه‌و ها گه‌ردنم.

ئى وێنه‌گر جايه‌ڵ جوانه‌ دوياى گله‌وخواردنى له‌ مه‌يدان ته‌حرير، جوور ئه‌وه‌گ قه‌ومه‌يلى باس كردن، چوار كه‌س خستنه‌سه‌ى ناو سه‌ياره‌يگ سيه‌و له‌وه‌رچه‌و داڵگى و بردنه‌سه‌ى وه‌ره‌و شوونيگ ناديار.