شەفەق نیوز/ سامان بەرزەنجی وەزیر تەندروسی هەرێم کوردستان، دووارە هوشداری دا لە قۆناغ ئیسە لە بڵاوبوین ڤایڕۆس کۆڕۆنا، ک باسی وە مەترسیدار کرد و هان دانیشتوەیل دا ئەرا پابەندی وەرێکار و رێوشۆنەیل مقەیەتی.
بەرزەنجی لە کۆنگرەی رۆژنامەوانییگ ل پشت واژو کردن یادداشتێگ تەندروسی وەل رێکخراو مانگ سوور ناودەوڵەتی وت؛ حکومەت هەرێم بوودجەیگ تر ئەرا وەزارەت تەندروسی دابینکرد ئەرا نواگردن ڤایڕۆس کۆڕۆنا، وهەمیش بوودجەیگ نوو لە حکومەت فیدڕاڵی کەفتە دەسمان، بیجگە هاوکاریە پزشکیەگان لە رێکخراوە دەوڵەتیەگان.
ولەباوەت هەڵوێست پاتایەگەی کۆڕۆنا لە هەرێم، وزیرەگە وت: ئەگەر بەراوردی رەوش ئیسە بکەیمن وەگەرد وەرجە مانگیگ یا دوومانگ، ک تووشهاتگەیل تۆمارکریاگ ورێژەیل مەترسیداریگ فرەوە بویە، و هوشداری دا وە بەرزەوبوین رێژەی تووشهاتنەیل وە ڤایڕۆسەگە ئەرا هەزاران، وشایەت سیستمە تەندروسیەگە لە هەرێم نەتوێنێد کۆنتڕۆڵ رەوشەگە بکەێد، وبویمنە جوور بڕیگ لە دەوڵەتەیل ک شوون خەفانن تووشهاتگەیل ئەرایان نەمەنەو.
وتیش؛ وەزارەت تەندروسی وەردەوامە لە رێکارەیل مقەیەتی لە دیاری کردن تووشهاتگه‌گان و چارەسەرکردنیان، وەگەرد کارکردن لە کەمەوکردن رێژەی مردگەیل لە بەشەیل چەودێری ورد، ورەوشەگە پشتگیری هاووڵاتیەیل خوازێد، ک هووکارە لە کەمەوکردن بڵاوبوین پەتاگە، وە دویرەکەفتن لە گرده‌وبوین وپابەندی وە رینما تەندروسیەگان.