شەفەق نیوز/ فراکسیۆن یەکێتی نشتمانی کوردستان، ئمڕوو دووشەممە، ئاشکراکرد لە جووڵەیگ ئەرا دروسکردن ژوور ئۆپراسیۆن سەربازی ناوبەین ئەمن عراقی و پێشمەرگە.
دیلان غەفوور نوێنەر فراکسیۆنەگە ئەرا ئاژانس شەفەق نیوز وت: هێزەیل پێشمەرگە هاناو سیستم سەربازی و ئەمنی عراق، و لەهەر وەختیگ حکومەت عراقی پێویستی وە جوولەی ئی هێزەیلە داشتوود خوەی ئامادەس، وەتایبەت لەو ناوچەیلە ک ئاڵۆزی ئەمنی وەخوەیان دوینن وەبی دیرکەفتن.
وتیش: جووڵە و باسکردن هەس ئەرا دروسکردن ژوور ئۆپراسیۆن هاوبەش ناوبەین هێز ئەمنی عراقی و پێشمەرگە لەوە ناوچەیلە ک ئاڵۆزی و شیواشیو هاناوی ک کاریگەری لە ژیان هاووڵاتیەیل دیرێد.
لە باوەت هاتنەوەی پێشمەرگە ئەرا کەرکوک، نوێنەر پارێزگاگە دووپاتکرد؛ هیچ فه‌رمانیگ یا بڕیاریگ فەرمی لەو باوه‌تە دەرنەچگە.
لەوەخت کیشانەوەی پێشمەرگە لە ناوچە دابڕیایەگان ، له‌ ساڵ ٢٠١٧ هەماهەنگی ناوبەین سوپای عراقی و هێزەیل پێشمەرگە بڕیا، ، لە پشت ریفڕاندۆم سەروەخوەیی ک به‌غدا تۆڕە کرد.
ئاڵوزیەگەی ناوبەین سوپای عراق و پێشمەرگە، و گومابوین هەماهەنگی ناوبەینیان، ژینگەی گونجیاگیگ دروست کرد ئەرا چەکدارەیل ریخریاگ داعش و ئەرا زیایکردن جموجووڵی لەو ناوچەیلە.