شه‌فه‌ق نيوز/ ناهيده‌ داينى ئه‌ندام ئه‌نجومه‌ن نوێنه‌ره‌يل له‌بان پاريزگاى دياله‌، ئاشكراى وجوود ريككه‌فتنيگ نوێنه‌رايه‌تى كرد له‌باره‌ى داناين دامه‌زرانن ده‌رسده‌ره‌يل په‌روه‌رده‌ له‌گشت پاريزگايه‌يل له‌ بودجه‌ى 2020 ك خه‌ريكه‌ ئاماده‌ ئه‌كريه‌ێد.

داينى ئه‌را ئاژانس شه‌فه‌ق نيوز وت: ئيمه‌ داواكارييگ فه‌رمى له‌وه‌ر داناين مه‌سه‌له‌ى دامه‌زرانن ده‌رسده‌ره‌يل په‌روه‌رده‌ وه‌تايبه‌ت ده‌رسده‌ره‌يل دياله‌ له‌بان مه‌لاك هه‌ميشه‌يى يا وه‌شيوه‌ى گريه‌به‌س وه‌زارى له‌چوارچيوه‌ى بودجه‌ى 2020 پيشكه‌ش كرديمنه‌سه‌ ليژنه‌ى دارايى په‌رله‌مانى له‌وه‌ر ئه‌و خزمه‌ته‌ ك وه‌ وژدانه‌و پيشكه‌شى كردنه‌ وه‌شيوه‌يگ خوه‌يبه‌خشانه‌ ئه‌را ماوه‌ى ساڵه‌يل فريه‌يگ له‌ پاريزگاى دياله‌.

داينى وت: له‌ساڵ 2008 تائيسه‌ ده‌يان هه‌زار ده‌رسده‌ر له‌ دياله‌ جيگيريان نه‌كرياگه‌ يا نه‌كريانه‌سه‌ گريه‌به‌س وه‌زارى و ته‌نانه‌ت به‌ش فريه‌يگ له‌ليان كه‌فتنه‌ ته‌مه‌ن ده‌يش رێ وشوونه‌يل دامه‌زرانن حكومى.