له ئاماده‌كارى تا سه‌عات سفر.. باس له شيوازه‌يل"غه‌زوه‌ى ره‌مه‌زان"له باشوور تكريت
شه‌فه‌ق نيوز/ وه‌رپرسيگ ناوچه‌يى له پاريزگاى سه‌ڵاحه‌دين باس له شيوازه‌يل ئه‌و په‌لاماره كرد ك داعش ئه‌نجامى دا ئه‌را بان چه‌ن كه‌رتيگ ئه‌منى سه‌ر وه حه‌شد شه‌عبى له باشوور پاريزگاگه ك ناوى نا"غه‌زوه‌ى ره‌مه‌زان".
له‌ى باوه‌ته‌و، مه‌حمود خه‌ڵه‌ف سامه‌ڕائى قايمقام سامه‌ڕا ئه‌را شه‌فه‌ق نيوز وت: گرووپه‌يل داعش په‌لامار كه‌رته‌يل حه‌شد شه‌عبى(فه‌وج دجله)دان له ناوچه‌ى مكێشيفه وه‌دويرى 40كم له باشوور تكريت و كه‌رت حه‌شد له ته‌ل زه‌هه‌ب- ليواى 41 له‌باشوور سه‌ڵاحه‌دين و كه‌رته‌يل تر له ده‌ورگرد ئه‌لدۆر و كه‌رت خوه‌رهه‌ڵات سامه‌ڕا.
سامه‌ڕائى وت: ئه‌و گرووپه‌يله له ته‌په‌يل حه‌مين و سه‌رچه‌وه‌يل عجێل و عه‌لاس و خوه‌رهه‌ڵات سه‌ڵاحه‌دين و بڕيگيش له‌ليان له قه‌زاى حه‌ويجه وه‌ره‌و قه‌زاى ئه‌لدۆر و باقى ناوچه‌يل تر هاتوين وه سوارى ماتۆڕسكڵ و بڕيگيش له‌ليان وه پياده و خوه‌يكوش بوينه.
سامه‌ڕائى ئاشكراى كرد سه‌عات سفر دويه‌شه‌و بويه‌و قورسايى په‌لاماره‌گه ئه‌را بان ناحيه‌ى مكێشيفه بويه ك جه‌نگ سه‌ختيگ له‌تى روێداو 11 كه‌س كوشياو دووانيش زه‌خمدار بوين و باس له‌وه‌يش كرد وه‌گووره‌ى زانياريه‌يله شماره‌يگيش له داعشيه‌يل كوشيانه.
له‌لايگ تره‌و، مورته‌زا به‌لداوى شاره‌زاى ئه‌منى و توێژه‌ر له كاروبار تيرۆر، وت: ريكخرياگ داعش له‌ڕێ ماڵپه‌ڕه‌يل ئعلاميه‌گه‌ى ناو ئه‌و په‌لاماره‌يله ناگه"غه‌زوه‌ى ره‌مه‌زان"ك وه‌رجه چه‌ن مانگيگ پلان ئه‌راى داناوێد.
به‌لداوى له‌باسيگ ئه‌را شه‌فه‌ق نيوز وت: په‌لامار ئى دوياخر داعشه، سه‌خترين په‌لاماريگ بويه له سه‌ڵاحه‌دين ك يه‌يش هه‌وه‌جه وه ئه‌وه ديرێد له‌و ناوچه‌يله هيز ئه‌منى پته‌وتر بكريه‌ێد.
