شەفەق نیوز/ دەسڵات فڕۆکەوانی مەدەنی، ئمڕوو یەکشەممە، رونکردنیگ دەرکرد لەباوەت دویاخستن گەشتەگان و پەیماننامە بردن لە گەشتیارەیل.
راگەیانن دەسڵاتەگە لە ئاشکراکردنیگ ئەرا رای گشتی و گەشتیارە عراقیەگان لە ناو ودەیشت وڵاتەگە، ك رەسیە ئاژانس شەفەق نیوز وت: هەوڵ و كوشش خوەی دەێد وەگەرد لایەنە پەیوەندی دارەگان ئەرا پێشکەشکردن گشت ئاسانکاریە پێویستەگان ئەرا گەشتیان و هاتنەوەیان ئەرا وڵاتەگەیان وە زویترین وەخت.
وتیش بڕیارە دویاینەگەی وە دویاخستن گەشتیە ئاسمانیەگان تا ١٥ تەمووز، بیجگە گەشتە وەخشینەگان ئەرا هاتنەوەی عراقیەگان یا موڵەت وە دەرچینیان وەرەو دەیشت، لەئەوانە ک ماف نیشتەجیی لەو وڵاتەیلە دیرن، تەنیا لەبان بڕیار دەسەی تەندروسی و سەڵامەتی هات لە بڕیار ٤١ ئەرا ساڵ ٢٠٢٠ لە دانیشتن شەشمی لە ٢٧/٤/٢٠٢٠ ک ئووشێد: موڵەتداین ئەرا هاوڵاتیە عراقیەگان خوەیان و خیزانیان ئەرا ئەو دەوڵەتەیلە ک لەتی ماف نیشتەجیی دیرن، وەگرد بردن پەیمان دەسنووس فەرمی وە نەهاتنەوەیان ئەرا عراق تا دویای کۆتایی هاتن پەتای کۆڕنا وەشیەوەیگ یەکجاری.
دەسڵاتەگە دووپاتکرد لە تەواوی پابەندبوینی وە جیوەجیکردن بڕیارەیل لایەنە باڵاگان لەعراق جوور ئەنجومەن وەزیران و دەسەی باڵای تەندروسی و سەڵامەتی نیشتمانی، تا بڕیاره‌یل نووەوە بوود لە باوەت جوولەی گەشتیاری ئاسمانی لە وڵاتەگە وه‌ختێگ بچووده‌ بان سروشت خوەی.