شه‌فه‌ق نيوز/ هاوپه‌يمانى فه‌تح وه‌ سه‌رۆكايه‌تى هادى عامرى، ئاشكراى ريككه‌فتن ناونى سه‌ركرده‌يل شيعه‌ كرد ئه‌را مه‌ندنه‌وه‌ى عادل عه‌بدولمه‌هدى سه‌رۆك وه‌زيره‌يل ده‌سله‌كاركيشاگ تاوه‌ختيگ هه‌ڵوژاردنه‌يل پيشوه‌خته‌ى ته‌شريعى ئه‌نجام ئه‌گرێد.

له‌ى باوه‌ته‌و، سه‌رچه‌وه‌يگ ئه‌را شه‌فه‌ق نيوز وت: هادى عامرى سه‌رۆك هاوپه‌يمانى فه‌تح و عه‌مار حه‌كيم سه‌رۆك ره‌وت حكمه‌ى نيشتمانى وه‌ل نورى مالكى سه‌رۆك ئئتلاف ده‌وڵه‌ت ياسا دانيشتنيگ ئه‌نجام دانه‌ ئه‌را گفتگوو له‌باره‌ى دامه‌زرانن حكومه‌ت تازه‌ى عراقى، ئه‌ويش دوياى خوه‌يكيشانه‌وه‌ى محه‌مه‌د ته‌وفيق عه‌لاوى له‌ دامه‌زراننى.

جى باسه‌، سه‌رچه‌وه‌گه‌ هه‌ميش وت: له‌و دانيشتنه‌يل لايه‌نه‌يل شيعه‌ ره‌سينه‌سه‌ ئه‌و ريككه‌فتنه‌ ك عادل عه‌بدولمه‌هدى سه‌رۆك كار وه‌ريخه‌ر له‌ پۆسته‌گه‌ى بمينێده‌و تا وه‌ختيگ هه‌ڵوژاردنه‌يل پيشوه‌خته‌ ئه‌نجام بگرێد له‌ ئمساڵ.