شەفەق نیوز/ رەوانگەی ماف مرۆڤ ' ئۆروناوڕاسی'' لە راپۆرتیگ ئاشکرای ئەو رەوشە کرد ك هەزاران لە گریاگەیل ناو زیندانەیل عراق وەخوەیان دوینن، و هووشاداری دا لە کارەسات مرۆیی نزیکیگ ئەگەر دەسه‌ڵاتە عراقیەگان وەردەوامبوون لە وەدویاخستن مەرەقەزکردنیان یا یەکلاوەکردن دۆسیه‌یلیان.
رەوانگە دادوەریە ناودەوڵەتیەگە، ک بارەگاگەی ها لە جنێڤ لە بەیاننامەیگ وت: بڵاوبوین ڤایڕۆس کۆرۆنا لە عراق، مەترسی گەورایگ خەێدە بان ژیان گریاگەیل، وەتایبەت ک زیندانەگان هیچ له‌ پێویستی چەودیری تەندورسی نەیرن.
رەوانگەگە ئاماژەدا؛ ک دەسه‌ڵاتەیل عراق زیاتر لە ٦٠ هەزار کەس دەسگیر کردنە، لەناویان ١٠٠ ژن هەس، بەشەو بوینەسە بان ١٣ زیندان حکومەتی، بیجگە دەیان زیندان نهێنی سەروە میلیشیا و حزبەگان و باڵەیل حەشد شەعبی و هووزه‌یل .
دیاری کرد؛ هیمان دەسه‌ڵاتەیل لەبان سیاسەت شاردنەوەی بایاننامە فەرمیەگان کارکەن، ک پەیوەندی دیرێد وە ژمارەی گریاگەیل لە ناو زیندانەیلی و رەوش تەندروسییان، و هەمیش حاڵەتەیل مردەن، وەتایبەت لە سای خراوی رەوش گیرهاوردن و وەپشتگووش خستن چه‌ودێری پزیشکی و بڵاوبوین بیماریەیل مەترسیدار و پەتایەگان.
هەمیش وت: لەوەر بەرزەوبوین هەڵمەتەیل دەسوەسەرکردن، و دیرکەفتن دادوەری لە یەکلاکردنەوەی باوەتەیل گریاگەیل، زیندانەگان قەرەباڵغن و فرەیگ هاناوایان ک هەژمار گریاگەیل فرەترە لە توانای بەشکردن زیندانەگان، وەتایبەت ک دەسڵاتەگان هیچ گامیگ راسی نەوردنە ئەرا چارەسەرکردن ئی گیچەڵە، تەنانەت وگەرد بڵاوبوین ڤایڕۆس کۆرۆنا.