شەفەق نیوز/ هێزیگ دژەتیرۆر دویای نیمەشەو پەنجشەممە/ جومعە، چیە ناو بارەگایگ سەروە کەتایب حزبولڵا و ژمارەیگ لەلیان دەسوەسەرکرد. ئەیە یەکم جارە ئۆپراسیۆنیگ لەی شیوە بوود، ک وەفەرمان موسەفا کازمی فەرماندەی گشتی هێزە چاەکدارەیل بوی.
سەرچەوەیگ ئەمنی ئەرا ئاژانس شەفەق نیوز وت: دەسنریا بان کارگایگ ئەرا دروسکردن مووشەک لەناو بارەگاگە، لە ناوچەی بوعێسەی سەروە دۆرە. ودیاری کرد ک هێزەگە ١٣ کەس دەسوەسەر کرد سەروە کەتایب حزبەڵا.
وەرپرسەیل ئەمریکی تومەبار کەتایب حزبولڵای سەروە ئیران کەن، لە وەشانن مووشەک لەبان سەربازگه‌یل ئەمریکی و دامەزراوەیلی لە عراق.
سەرچەوەیلیگ سەروە حەشد شەعبی وتن؛ ئەوانەیگ دەسوەسەر کریان دویای کەمیگ رەوانە کریان ئەرا دەزگای ئەمنی سەروە هێزەیل حەشد، وەلی وەرپرس حکومەتییگ تر ئەوە رەتکرد، ووت؛ گریایەگان هیمان هانە لای دەزگا ئەمنیەگان. ئەوە لە دویای پەلامارەیل مووشەکی نزیک باڵیۆزخانەی ئەمریکی لە بەغداد و کامپەیل سەربازی ئەمریکی تر هات لە هەفتەیل دویایین.