دوياى روێ وه‌ڕوێ بوينه‌وه‌ى سه‌ختيگ.. زيقار وه ته‌واوى پاريزگاگه داخست
شه‌فه‌ق نيوز/ ده‌سڵاته‌يل ئه‌منى له پاريزگاى زيقار له باشوور عراق، بڕيار چه‌سپانن قه‌يه‌غه‌ى هاتوچوو ته‌واويگ دا له‌ناو پاريزگاگه، ئه‌ويش دوياى روێ وه‌ڕوێ بوينه‌وه‌ى سه‌ختيگ له‌ناونى خوه‌ينيشانده‌ره‌يل و هيزه‌يل پۆليس ك له‌ئه‌نجاميش دو كه‌س كوشيان و شماره‌يگ له هه‌ردوگلا زه‌خمدار بوين.
له‌ى باوه‌ته‌و، عه‌ميد ناسر ئه‌سه‌دى سه‌ركرده‌ى پۆليس پاريزگاگه له به‌ياننامه‌يگ وت: وه‌گووره‌ى رينمايه‌يل شانه‌ى قه‌يران و رويداگه‌يل دويه‌كه، بڕيار چه‌سپانن قه‌يه‌غه‌ى هاتوچوو ته‌واويگ درياگه ئه‌را پاريزگاگه وه‌ل به‌سانن ويستگه‌يل سوزه‌مه‌نى و بڕين گشت رێ و بانه‌يل و داخستن دوكان و بازاڕه‌يل ته‌نيا دوكانه‌يل مادده‌ى خوه‌راك و ئاشخانه‌يل سه‌فه‌رى و سه‌وزه‌مه‌نى له‌لى بترازيه‌ێد.
جى باسه، ئه‌سه‌دى داوايش له مه‌ردم كرد هاوكارى وه‌ل هيزه‌يل ئه‌منى بكه‌ن ئه‌را مقه‌يه‌تى له ئاسايش و سه‌ڵامه‌تى پاريزگاگه‌و باس له‌وه‌يش كرد فه‌رمانيش ده‌ركريه‌ێد ئه‌را هيزه‌يل بچنه حاڵه‌ت ئنزار و دوايش ئه‌كريه‌ێد گشت كارمه‌نده‌يل سه‌ربازى په‌يوه‌ندى بكه‌ن يه‌كه‌يليان له‌وه‌ر خاتر جيوه‌جيكردن قه‌يه‌غه‌ى هاتوچوو.
