شەفەق نیوز/ سەرچەوەیلیگ خۆجێی لە بەغداد پایتەخت عراق، ئمڕوو چوارشەممە، خەوەردان لە دووباره‌وبین خۆپیشاندان و ناڕەزیەتیەگان وە داواکردن خاسەوکردن سیستمەگە و سزادان گەندەڵەیل.
سەرچەوەگە ئەرا ئاژانس شەفەق نیوز وت: دەیان كه‌س لە خوپیشاندەرەیل مەیدان تەحریر له‌ شەوەکی ئمڕوو گردەو بوین، لە نزیک جادەی خێرای محمد قاسم، وەبی هیچ ری بڕینیگ.
وتیش: هێزە ئەمنیەگان هانە ئەولا وەبی هیچ چەکیگ.
لە تەشرین یەکەم ساڵ گوزەیشتە، بڵویزەی خوپیشاندانەگە لە بەغداد و ژمارەیگ لە پارێزگا شیعەگان دەسکردە پی لەناوڕاس و باشوور عراق، لە ناڕەزایەتی لەبان خراوی رەوش ئەمنی و خزمەتگوزاری و خراوی گوزه‌ران، وزیابوین ژمارەی بیکارەیل لەناو گەنجەیل، و بڵاوبوین گەندەڵی دارایی و وەڕیەوبردنی لە دامەزراوەیل دەوڵەت و فەرمانگەیلی.
راده‌ی داواکاریەگان بەرزەوبوی ئەرا رمانن حکومەت وپەڕلەمان و دویرەوخستن گشت حزبە بەشدارەگان لە ئۆپراسیۆنە سیاسیەگە لە ساڵ ٢٠٠٣ تا ئیسە. دویای ئەو توندوتیژی و په‌لامارە ک کەفتە بان ناڕەزایەیل، و دەیان کوشیاگ و سەدان زەخمدار لەلیان کەفتەو. ئی خۆپیشاندانەیلە هیشت عادل عەبدولمەهدی وەل کابینە حکومەتیەگەی دەس له‌كار بكیشن ، تا لەشوون چەن مانگیگ ناکۆکی سیاسی ئه‌را پەسەنکردن کاندیدەیل دویاجار حکومەت موستەفا کازمی جیگیر بوود.