شه‌فه‌ق نيوز/ بانك رافده‌ين ئاشكراى كرد و وت: ئه‌و كارمه‌نده‌يله‌ ك مووچه‌يليان جيگيره‌ له‌لاى بانكه‌گه‌و ماسته‌ر كارد ديرن و ناكه‌فنه‌ وه‌ر سلفه‌ى 25 مليۆنيه‌گه‌ ئه‌توينن له‌ڕێ سه‌كو ئه‌لكترۆنى چه‌وديرى بژارده‌يليگ بكه‌ن ك بانكه‌گه‌ داناسه‌ى تا بتويه‌نن ئه‌و سلفه‌ وه‌ربگرن.

له‌ى باوه‌ته‌و، نويسينگه‌ى ره‌سانن بانكه‌گه‌ له‌ به‌ياننامه‌يگ وت: بايه‌سه‌ له‌بان ئه‌و كارمه‌نده‌يله‌ ك ناويان له‌ وه‌رگرتن سلفه‌ نيه‌ له‌وه‌خت پڕه‌وكردن فايل ئه‌را وه‌رگرتن له‌ڕێ ناونيشان qi.iq/loans چه‌ن گاميگ بگرێده‌وه‌ر تا بكه‌فێده‌ وه‌ر وه‌رگرتن ئه‌و سلفه‌، له‌وانه‌يش: بچێده‌ ناو ئه‌و ناونيشانه‌و داواكارييگ پيشكه‌ش بكا ئه‌را كه‌فتنه‌وه‌ر تازه‌ وه‌ سلفه‌، ك ئه‌گه‌ر له‌حاڵه‌يگيش وه‌رنه‌گريا، په‌يوه‌ندى وه‌ ناوه‌ند خزمه‌گوزاريه‌يل بكا له‌بان شماره‌ 422 له‌وه‌ر زانستن رێ وشوونه‌يل په‌يوه‌س وه‌ سلفه‌.

جى باسه‌، ئاماژه‌ وه‌يه‌يش كرد ك وه‌پيداين سلفه‌ وه‌گووره‌ى مه‌زه‌نه‌كردن مووچه‌ى كارمه‌نده‌گه‌ ئه‌دێ.