شەفەق نیوز/ وسیاگە لەناوڕاس هۆڵ دادگا، دەمچەو خوەی شاردیەسەو، شایەت روی سیە بیە وە گوناه وەرژە چەن ساڵیگ، وەگەرد دوەیت پەنج ساڵانێگ، ئی تاوانبارعیراقیە ک روژ جومعە هاتیەسە دادگا، بوختکریاگە وە کوشتن مناڵیگ ئەیزیدی وە تینگی لە ژیر تیشک خوەر سویەر.
دەسڵاتەیل داد لە ئەڵمانیا ناو تەواوەتیی نەخستنە دیار، وەلی سەرچەوەیلیگ جێ باوه‌ڕ، ناو ئەبو معاویە ئاشکرا کردن.
ئەبو معاویە ناوی تەها جومەیلیە خەڵک شار فەلوجەس . ئی پیاو ٣٧ ساڵانە پله‌و پایه‌ وشوینیگ گرنگ لە داعش داشتگە. چوینکە له‌ باوه‌ت ئه‌وه‌ ك بەشدار جەنگ بویە دژ هێزەیل عیراق، ژنیگ ئەڵمانی پێشکەش وەپی کریاس،ناوی جینیڤیر فینیشە. لە ناوڕاس ساڵ ٢٠١٥ داعش ژنیگ وەل دویەتەیا وە پی داس، تا بونە نەوکەر ئەبو معاویەو ژنە ئه‌لمانیه‌گه‌ی .

دویای جەنگ رزگارکردن فەلوجە، جومەیلی و جینیڤەر واین ئەرا تورکیا، لەورەو ژنەگەی چی ئەرا ئەڵمانیا. دویای لێکۆڵینەوە وەگەرد جینیڤەر، وقسەیلی لە باوەت شویەگەی، زانیاریەگان کەفتنەدەر، ئه‌بو معاویه‌ لە وەخت رەسینی ئەرا ئەسینا لە دەریای ئیجەوە دەسگیر کریا ودریا وەدەس دەسڵاتەیل ئەڵمان وه‌ تاوان کوشتن.

لە باوەت دایگ ودویەتە قوربانیەگه‌، روژنامە نویس سامان ئەیزیدی وت: جومەیلی شکەنجەی داڵگەگە (نور) ودوەیتەگە ( رانیا) دیاد، لە تاوسان سویەر، ساعتەیل فرەیگ وە بی ئاو، هیشتیادەیانە ژیر تیشک خوەر، وەردەوامیش دەسەیل سەختیگ لیان وەشانیاد.
سامان وتیش: شەویگ مناڵەگە میز کردویدە جی، بیدارەو بی وە گیرست، یەیش بیزار داعشەگە کرد، شەوەکی بردەیە دەیشت ماڵەگە، وبەساگەی قەی یەکی لە پەنجەرەیلە ، وهیشتەی وه‌ خوه‌ر لەوەر چەو داڵگەگە تا لە تیەنگی لە ژیر خوەر سویەر تاوسان گیانی دەرچگ، کوت لە داڵگەگیش کرد وەپای پەتی ری بکەێد، لە ژیر خوەرەگە تا هەردگ پای سزیان، لەوریشەو ژنە ئەڵمانیەگەیش تەماشای ئی شکەنجە وکوشتنە کەێد، وە بی یەگ پرتەیگ لە چەوی باد.

لەی باوەتە سامان وتیش؛ تاوانباره‌گە لە یونان دەسوەسەر کریاس، ولە ٩ ی تەشرین دووەم رەوانەی ئەڵمانیا کریا.
لە لای خوەیش موڕاد ئیسماعیل وەڕیەوبەر جیوەجیکار رێکخراو ( یەزدا) باس لە راستەقینەی چیرۆک شکەنجەگە کرد، وتیش ک تیم یاسای رێکخراوەگە ئەرا چەودێری کەیسەیل ئەیزیدیەیل، وە راستەخۆ بەشدار بوینە لەی کەیسە.
وتیش؛ لە ئەیلول ٢٠١٤ ،وەختا ریخریاگ داعش کۆنتڕۆڵ ناوچەیلیگ لە عیراق کرد، داڵگەگە وە گەرد هەزاران ئەیزیدی رفیا وەل دویەتەگەی ک ٣ ساڵ ونیم تەمەنی بوی، وباوگ مناڵەگەیش داعش لە شەنگال کوشتەی.