"كۆرۆنا" مليۆنه‌ها كه‌س له ئيتاڵيا خسته كه‌ره‌نتينه‌و چه‌ن شاريگ داخست
شه‌فه‌ق نيوز/ ده‌سڵاته‌يل ئيتاڵى ده‌سكردنه كه‌ره‌نتينه‌كردن مليۆنه‌ها كه‌س له‌وه‌ر سه‌ڵامه‌تى ته‌ندروستييان له باكوور وڵاته‌گه، ئويش له تازه‌ترين گامه‌يليگ ئه‌را ريگرى له بڵاوبوينه‌وه‌ى زياتر ڤايرۆس كۆرۆنا له وڵاته‌گه.
له‌ى باوه‌ته‌و، ئاژانس هه‌واڵه‌يل فره‌نسى ئه‌وه ده‌رخست ك جيوسيبى كۆنى سه‌رۆك وه‌زيره‌يل ئيتاڵى، فه‌رمانيگ سه‌رۆكايه‌تى ئمزا كردگه، ك وه‌گووره‌ى ئه‌و فه‌رمانه به‌شيگ له باكوور وڵاته‌گه ئه‌خريه‌ێده كه‌ره‌نتينه.
جى باسه، كۆنتى له ڕێ لاپه‌ڕه‌ى خوه‌ى له ماڵپه‌ڕ تويته‌ر ئاشكراى ئمزاكردن ئى فه‌رمانه كرد ك مه‌رجه‌يليگ وه‌رده‌وام ئه‌گرێده خوه‌ى له‌بان چگنه‌ناو و هاتنه‌ده‌يشت ئه‌را ناوچه‌يل فراوانيگ له باكوور ئيتاڵيا و ئه‌و ناوچه‌يليشه ك ئه‌كه‌فنه وه‌ر بريار داخستن پيكهاتنه له ناوچه‌ى لۆمبادريا وه ته‌واوى ك شاره‌يل ميلانۆ پايته‌خت ئابوورى وڵاته‌گه له‌خوه‌ى ئه‌گرێد و ناوچه‌ى بونده‌قيه‌و باكوور ناوچه‌ى ئيميليا و رۆمانيا و خوه‌رهه‌ڵات بيمونتى، ك زياتر له 16 مليۆن كه‌س له‌ى ناوچه‌يله ژيه‌ن و دابه‌ش بوينه له‌بان 14 شوون.
