ده‌سڵات "ته‌يمورخان ئاجرلويى" له كوردستان
شه‌فه‌ق نيوز/ ئى ته‌يمورخانه وه‌ل مه‌ردم مه‌مله‌كه‌ت هه‌ڵسووكه‌فتى خاس و ره‌فتار جوانيگ كردياد، وه‌ل گه‌وراو بويچگ خه‌لك مه‌مله‌كه‌ته‌گه برايانه ره‌فتار كردياد، شه‌ش ساڵ وه‌ى شيوه له كوردستان حوكمڕانى كرد، دوياى شه‌ش ساڵ و له‌ساڵ (1099)كووچى دوباره خان ئه‌حمه‌د خان كوڕ كه‌لبعه‌لى خان ئه‌رده‌ڵان كريا حاكم كوردستان و وه فه‌رمان شا سلێمان سه‌فه‌وى رويكرده سنه‌و شاره‌زوور.
ئى خان ئه‌حمه‌د خانه ك ئه‌را جار دويه‌م له ولايه‌ت كوردستان سه‌روه‌خوه‌يى كه‌فته‌و، له جاران زياتر زياده‌ڕه‌وى و له جاران كرد له كاره‌يل خوه‌شگوزرانى، ئمجا وه‌ختيگ ك سلێمان پاشاى بابان وه حاڵ خان ئه‌حمه‌د خان زانست، مه‌ردم فريه‌يگ له تايفه‌يل كورد و عه‌ره‌ب وه‌ل خوه‌ى ريكخست و له‌ساڵ 1103 كووچى په‌لامار بان مه‌رزه‌يل كوردستان و مه‌ريوان و سه‌قز و هه‌ورامان گرت و "زۆراب سوڵتان"حاكم سه‌قز و "ئبراهيم به‌گ مير ئه‌سكه‌نده‌ر"حاكم مه‌ريوان كوشت.
خان ئه‌حمه‌د خان خوه‌ى نه‌چێ ئه‌را روى وه‌ڕوى بوينه‌وه‌ى و شا سلێمان له مه‌سه‌له‌گه ره‌سانه‌و، له‌لايه‌ن شا سلێمانيشه‌و"روسه‌م خان سوپاساڵار" و عه‌بس خان زياد ئوقڵى وه له‌شكريگه‌و ره‌وانه كريان ئه‌را ده‌سميه‌تداين خان ئه‌حمه‌د خان، له ده‌يشت مه‌ريوان هه‌ردوگلا ره‌سينه يه‌ك، سوپاى پاشا شكياو فيشتر له 4 هه‌زار كه‌س له‌ليان كوشيان و وه‌ديل گيريان.
دوياى ئى سه‌ركه‌فتن ديار و گه‌ورا، عه‌باس خان زياد ئوقڵى وه فه‌ن وفيڵ و هه‌ڵخه‌ڵاتانن له‌لايه‌ن قاسم سوڵتان هه‌وراميه‌و، تومه‌ت ئى سه‌ركيشى سلێمان پاشا ئه‌ياده پاڵ والى و مه‌ردم كوردستان.
ئمجا شماره‌يگ له گه‌ورا پياوه‌يل كوردستان وه‌ل 1200 كه‌س له ره‌عيه‌ت ئى مه‌مڵه‌كه‌ته گرفتار ناڕه‌حه‌تى و شكه‌نجه ئه‌كاو دوياى تاڵانكردن موڵك و ماڵيان فه‌رمان كوشتن ئه‌و بيچاره‌يله ئه‌ياد و له لاشه‌و سه‌ر ئه‌و بيچاره‌يله ته‌په‌يگ له ده‌يشت مه‌ريوان دروس ئه‌كا، ك ئيسه‌يش ئه‌و ته‌په هه‌ر مه‌ندگه‌و ناسرياگه وه ته‌په‌ى(كه‌له‌كێو) كه‌له كويه. يه‌يش وه‌و مانا ئه‌و ته‌په له كه‌له‌ى ئاده‌ميزاد دروس كرياگه.
شا سلێمان له ته‌قاس ئى كاره‌يل دڕندانه، عه‌باس خان سه‌ردار له مه‌يدان ئه‌سفه‌هان ئه‌ياد له‌سێداره، له‌ساڵ 1107 كوچى شا سوڵتان حسێن ده‌س ئه‌كاده لاوردن ئه‌حمه‌د خان له‌بان كار و محه‌مه‌د خان كوڕ خه‌سره‌و خان له حكومه‌ت كوردستان دامه‌زرنێد، ماوه‌ى ئى حوكمڕانى دويه‌م خان ئه‌حمه‌د خانه 9 ساڵ ناته‌واو بوى.
عه‌لى نه‌قى ئه‌لحوسه‌ينى
