خان ئه‌حمه‌د خان دويه‌م
شه‌فه‌ق نيوز/ له شوون ئه‌وه‌گ كه‌ڵباڵى خان ماڵئاوايى يه‌كجارى له دونيا كرد، خان ئه‌حمه‌د خان كوڕى وه‌ناو خان ئه‌حمه‌د خان دويه‌م شوونى گرت. كه‌ڵباڵى خان له گرده‌وكردن ته‌ڵاو مجه‌وهه‌رات و موڵك و ماڵ ده‌ور باڵايگ داشت، وه‌لێ وه‌ل ئه‌وه‌يشا قه‌تره‌يگ ئاو وه مامره كووريگيش نه‌يا، ئمجا هه‌رچه‌نى ماڵ نا يه‌كه‌و هه‌ر جوور خوه‌ى مه‌ند و ده‌س له‌لى نه‌درياوێد.
ئه‌حمه‌د خان وه ته‌مامى دژ ره‌فتاره‌يل باوگى بوى، دوشمن پويل و دارايى بوى، ده‌سكرده په‌خشان و ته‌خشانيگ مه‌گه‌ر خودا خوه‌ى بزانێد، به‌هه‌يشت خوه‌ى له‌بان دونيا دروس كردوێد، جوانى په‌رس بوى و شه‌راو كويه‌ن و مه‌زه‌ى تازه وه‌لايه‌و له گه‌نجينه‌ى كه‌يخوسره‌و وه قيمه‌ت تر بوى، خوه‌شگوزه‌رى كردياد و خوه‌ى له كاروبار دوير له عه‌يش و نووش پاريزياد، خوسره‌و خان ك چه‌وى كه‌فت ئه‌حمه‌د خان له‌ڕى ئى كرده‌وه‌يله‌و كه‌ڵك والييه‌ت وه‌پيه‌و نه‌مه‌ندگه، ناو ياخييه‌ت وه‌پيه‌و لكان و له والييه‌ت لاورده‌ى و تويه‌نست فه‌رمانى حوكمڕانى له شاى ئه‌سفه‌هان وه‌ربگرێد و له شه‌ويگ له مه‌ريوانه‌و خوه‌ى ره‌سانه سنه و له ده‌مه‌و سووييگ له‌شكربه‌زى كرد و كوتوپڕ سه‌ركه‌فت له‌بان خان سه‌رخوه‌ش و ده‌س وپاى زه‌نجير كرد و ره‌وانه‌ى كرد ئه‌را ئه‌سفه‌هان نيشته بان ته‌خت برارزاى.
ئسماعيل مه‌لا حه‌مه حوسێن له مێژووه فاسيه‌گه‌ى ئويشێد: له دوياى مه‌رگ كه‌ڵباڵى خان، كوڕه‌گه‌ى ك ناوى ئه‌حمه‌د خان دويه‌م بوى وه‌بى ئه‌وه‌گ خه‌وه‌ر بيه‌ێده ئه‌سفه‌هان و فه‌رمان له شاى سه‌فه‌وى وه‌ربگرێد، خوه‌ى كرده جينشين باوگى.
ئه‌حمه‌د خان پياويگ فريه ده‌سواز و هه‌ر‌زه‌كار و كه‌للـه‌يى بوى و گووش وه نوسحه‌ت هويچ كه‌سيگ نه‌ياو ئه‌و هه‌مگه دارايى و سه‌روه‌ت و سامانه ك باوگى ناره‌ى يه‌كه‌و گشتى كه‌فته چنگى و ته‌خشان په‌خشانى كرد و رووژگاريشى وه ڕاوكردن و خوه‌شگوزه‌رى و شه‌وه‌يليش وه به‌زم و خوه‌شى بردياده سه‌ر.
خوسره‌و خان كوڕ سلێمان خان ك ئاموزاى ئى ئه‌حمه‌د خانه بوى، له‌و سه‌رده‌مه ك زانست ئاموزاگه‌ى قيمه‌ت چه‌نيگه ڕى گرته‌وه‌ر و خوه‌ى ره‌سانه لاى شاى ئيران و دژ ئاموزاگه‌ى كه‌فته قسه‌كردن ك وه‌بى فه‌رمان شا خوه‌ى كرده‌سه والى و هه‌رچى خودا و په‌يغه‌مبه‌ر حه‌ز له‌لى بكه‌ن ئه‌و ئه‌نجامى نيه‌ێد، خولاسه له‌يوا له شا كرد ك والييه‌ت ئه‌را خوه‌ى بنويسێد، ئمجا فه‌رمان والييه‌ت وه‌رگرت و له‌ناكاويگ ره‌سيه سنه و ئه‌حمه‌د خان گرت و ره‌وانه‌ى كرد ئه‌را ئه‌سفه‌هان، ئه‌وه بوى له‌و ساڵه ك 1091 كووچى بوى فه‌رمانڕه‌وايى سنه كرده قسمه‌ت خوه‌ى.
مه‌ستووره‌ى كوردستانى
