وه‌گشتمه‌وه‌ له‌شووند گه‌ردم،

وه‌ چه‌وم،

توو دڵه‌يل ئه‌راد گه‌ردم!

وه‌دڵ،

نيگايه‌يل وشكنم

په‌نجه‌يلم...

پەڕە پەڕە،

ديوانه‌ شيعره‌گان هه‌ڵه‌وده‌م

رخ له‌وه‌ ديرم...

شاعيريگ

له‌چوارچێوه‌ى

وێنه‌يگ شيعرێ به‌ند كردوێد!

يا قافيه‌ێ شيعره‌يله‌گه‌ێ

له‌بان كيش په‌نجه‌يل ت داناوێد

ترسم

وێنه‌كيشيگ ...

له‌هويريه‌و بچێد دڵنگ له‌وه‌رد بكا؛

له‌هه‌ركاملايگ ئه‌تڵه‌س له‌شد؛

ماچيگ وه‌جێ هيشتوێم،

بكاده‌ێ ميتۆدى تابلۆوه‌يلێ!

ترس له‌ مۆزيسيانێگ ديرم...

بكاده‌ده‌ نوته‌ێ ئاوازيگێ و؛

له‌ قوڕگ فلوته‌گه‌ێ گيربخوه‌ێ!

مه‌قامچڕێگ ...

بكاده‌ده‌ قه‌تار، وه‌ خاوكه‌ر و ئاى ئاى!

مه‌ته‌ڵنويسێگ...

وه‌ گريه‌ێ مه‌ته‌ڵێگ جه‌نگيى

نويسه‌ريگێش وه‌ ناونيشان،

ماچنامه‌يل خوه‌ێ!

(ملكۆ ئه‌حمه‌د)