زانم وه‌‌ئشقد‌ ئه‌‌ى هاوزوانم

ئاگر ئه‌‌و ئشقه‌‌ له‌‌زوى ها گیانم

ئشق ئاشقه‌‌یله‌‌ خه‌‌مین و ماتن

ئشق ئه‌‌وانه‌‌یش دویر له‌‌ وڵاتن

ئشق گوڵه‌‌یله‌‌ له‌ڕه‌‌نگ گوێڕیانه‌‌

ئشق داره‌‌یله‌‌ چوى ئه‌‌ڵگڕیانه‌‌

ئشق بوڵبوڵه‌‌ تش باڵ كریاگه‌‌

له‌‌ناو قه‌‌فه‌‌س و زندان نریاگه‌‌

ئیشق پیر مه‌‌یه‌‌ دویر له‌‌مه‌‌یخانه‌‌

ئشق مه‌‌له‌‌وه‌‌ر بى ماوا و لانه‌‌

ئشق هه‌‌زاره‌‌س هات وه‌‌ئه‌‌زره‌‌ته‌‌و

نووڕنه‌‌ ده‌‌روه‌‌چه‌‌ى به‌‌سیاگ شه‌‌كه‌‌ته‌‌و

ئشق دڵ خوه‌‌مه‌‌و عه‌هد و په‌‌یمانم

تن ماره‌‌ى هویرم من خوه‌‌م خاس زانم

هویر و خه‌‌یاڵم دایم هاوه‌‌لدان

ئه‌‌و ڕووژه‌‌ كه‌‌ى بایگ بویاتامه‌‌ ‌میوان‌

ئه‌‌سپم زین كردمه‌ ‌و‌ له‌ ‌‌ئینتزارم

چه‌‌پكى گوڵ نه‌‌رگز وه‌‌دیارى بارم

خوه‌‌م و هاوڕیه‌‌یل تووشگ به‌‌سایمه‌‌

له‌‌مه‌‌رزه‌‌گه‌‌دان ڕییگ دانایمه‌‌

ئه‌‌ر تیه‌‌ریك شه‌‌و بووگ یا چله‌‌ى زمسان

وه‌‌فریش بواریگ بووگه‌‌ ڕیبه‌‌سان

مه‌‌نه‌‌لى براى شار(ئه‌‌یوان)ه‌‌

دڵسووز ئیلام و ڕى (تاقووسان)ه‌‌

شار كرماشان تا قه‌‌سر شرین

نزیك وه‌‌ سنوور شار خانه‌‌قین

یانه‌‌ به‌‌شیگن له‌‌ى كوردستانه‌‌

وه‌‌ زوور و ناهه‌‌ق به‌‌شبه‌‌ش كریانه‌‌

یه‌‌ ئه‌‌و ڕووژه‌‌سه‌‌ هه‌‌قمان ته‌‌قاز كه‌‌ى

گشت هه‌‌قخوریاگیگ ڕه‌‌سیگه‌‌‌ هه‌‌ق خوه‌‌ى

سالم خه‌مانی