لەیلا قاسم
وتم خانەقین چوینید وت خاسم
خاسم وە سایەی سەر لەیلا قاسم
وتم خانەقین جوی عاشق ئویشید
چمان دڵدارید هەناس هەڵکیشبد
وت عاشق لەیلان هەرچەگ هالەتیم
ئەویش عاشقمەو باوەڕ کەێد وەپیم
ئەو شیرین منەو منیش جوی فەرهاد
گشت شەوەکیانیگ ناوی کەمەو یاد
وەگەرد خوەر دەرچین دەنگ ئاواز خوەنم
هەگ خوەراوا بوود پی نماز خوەنم
هەر وەختا عشقی لەلیم پەنگەو خوەی
شیشەی دەروینم ئەرای زەنگەو خوەی
ئەڵوەن بەرزوە بوود دەس کەێدە لافاو
وەختا تینی بوود لەیلا بودەو ئاو
لەیلا ئەرا من وینەی شەمیگە
ئەرا کوردوستان دەسو دەمیگە
شەم لە تاریکی گڕەی دیارە
نیشان وڵەیل دەی وینەی ئەسارە
شەم ئەرا مەردم وەگیانی چڕێد
چمان وەچەقو سینەی شەو دڕێد
وەپەی ڕەفتاری تیوڵمان بەرزە
تەخت دوژمنمان هاوردەو لەرزە
هەر چەنی وەپەت کردیانەی دارەو
دارو دەستەیان هاوردیا خوارەو
جوی داڵگ نویخان کردمە گاوەسن
دەمچەو خوەم کاڵیم گوڵم کەن پەسەن
وەئەسرو خوینم نیشتم ئاوی دام
تاگوڵ رەوزەو بی لەیلا ناوی نام
جوی دەنگ هویلەی ئەسپ گشت ڕوژی ناڵم
هەفتا هەزار سوار گڕ خوەی لە ماڵم
دیوارەیل زندان پەنجە موری کرد
کڕكڕیان کیشا جوی روژنامەی کورد
یەک کڕ گەلاوێژ یەک کڕ خەرمانان
یەک کڕ وەفرانوار ئەواکەیش گوڵان
تا دویاترین کڕ کڕ نەوروز کیشا
تا ئەگەر کوشیا پەل بەی جوی ڕیشە
بایەت ناو لەیلاو مەجنون بسڕین
لەیلاو خانەقین لە جیای بچڕین
من شەیدای لەیلام لەیلای خوەم ناسم
خاسم وە سایەی سەر لەیلا قاسم
كه‌نعان حاته‌م
