هه‌م تام بێ‌که‌سی ده‌ید، هه‌ر دِ ده‌س په‌تیمان

وه‌ێ پرزه پرز نه‌رمه‌و ئێ ئاسمانه زانس

یه‌ێ گام تر مه‌نويدن تا فه‌سل بێ‌که‌سیمان

ئی ئاگره نیه‌زانم یه‌ێ هه‌و له کووره‌ێا هات

هه‌ر جوورِ که‌پر سزیاێ چشتێ نه‌مه‌ن له لیمان

هه‌ێ داد دی نه‌مه‌نێه ئه‌سرێ ئڕا چه‌ویلم

ئه‌وره‌یل داخداره، گیرن وه کز له جیمان

له‌ێ رێ تیه‌ریک و چووڵه  په‌شێوو خه‌م له کووڵیم

رووشن تره ک له واران، یه‌ێ گڕ بنووره پیمان

به‌ت

نیه‌زام بتێگه یا به‌تێ، ره‌نگینه خاڵێ و خه‌تێ

وه قه‌وڵ داڵگم وه‌تێ، یه که‌ێدن ئاخرێ که‌تێ

هساره‌گان له بن تواێ، بڵێن و به‌رزه ئه‌و هه‌واێ

ئه‌گه‌ر گرێ وه ئێره باێ وه لاێ من و ت هه‌ر نیه‌تێ

هساره‌گه‌ێ شه‌وه‌کیه له شکڵ و شێوه‌گه‌ێ نیه

هه پرشه پرش ِ نويریه، فره گرانه قیمه‌تێ

خوه‌ر و هساره رووژ و شه‌و تێه‌نه‌و نوای و ده‌وبده‌و

که‌سێ ک ئاسمان که‌و هه‌میشه ها له ئه‌زره‌تێ

بمینیه‌ێ له لاێ خوه‌مان وه گیان خوه‌م  م دوينمان

گله گله هساره‌گان وه شه‌و تیه‌نه زێاره‌تی

نیه‌زاێ ئرا گرێ ته‌وم، هه‌میشه ها وه‌ر چه‌وم

خه‌نێ خه‌نم، وسێ، ده‌وم، که‌سێ له واێ م پێ نیه‌تێ

له ئاسمان خه‌وزێه‌وم، وه یاد ئهوى به‌سم چه‌وم

دوواره ده‌ێ له یه‌ک خه‌وم، ده‌نگ د ِ باڵ یه‌ێ به‌تێ

ساێ چه‌و

ئمشه‌و له ساێ چه‌وه‌یلد داکاسیامه بیله‌م

تا گه‌ر سفێد‌ه‌گه‌ر سوو، هه‌ر ئێره جامه بیله‌م

ئه‌ى ئه‌ور پڕ له واران، له‌ێ دار وشکه چوه توای؟

له‌ێ ژیر پرزه پرزه، بێ ده‌نگ  وسامه بیله‌م

تا روژه‌گه‌ێ قێامه‌ت، دڵ جم نیه‌خوه‌ێ له جاگه‌ێ !

له‌و زڵف تاڵ تاڵه، پاوه‌ن له ‌پامه بیله‌م

هه‌ر جوور که‌پر ته‌نیاێ، ده‌س گرتمه وه قه‌ێده‌و

تا چه‌و بپرتنیدن، داتوى چیامه بیله‌م

باخ به‌هه‌یشت

باوشد باخ به‌هه‌یشته، زوڵفه‌گه‌د مانگه‌شه‌وه

هاتیه‌و، باوه‌ر نیه‌که‌م، ئويشم دروو یا گه‌ر خه‌وه

باڵێان به‌ێ تا وڵاتی بووده رووژ نیمه‌روو

ئه‌ێ خودا گیانم بکه‌یده نه‌زر ئه‌و هه‌ر د ِ چه‌وه

هه‌ر چێ چه‌و هه‌زره‌ت‌مه‌نه، هه‌ر شه‌و هه‌ده‌ن له دێوڵه‌و

تا ک شاێه‌د مانگ گریاێێ دراێ له‌و وه‌رقه‌وه

حه‌ق بیه ئێ که‌وتریله باڵ بگرن تا خودا

ئاسمانیگه ئڕا خوه‌‌ێ، هه‌ر گله‌ێ ئه‌و چه‌و که وه

پیچ پیچ جاده‌گان زوڵفه‌گه‌د، چوى بێ ریه

ئاهوو و که‌ڵ هه‌م شه‌که‌ت بوون ئی رێه‌یله دڵ ره‌وه