خێاڵ یــــاخیه‌گه‌ێ
خێاڵ یــــاخیه‌گه‌ێ ده‌ردم ههر شه‌و
له هووز دارســــانێ زه‌ردم ههر شه‌و
م یه‌ێ عومره له ناومه‌رزان كــه‌‌ڵهوڕ
له فێر ئه‌و چه‌وه‌یله گه‌ردم ههر شه‌و
***
له ئێ ئێڵه چه‌ود بێخـــاونه‌و خوه‌ێ
گه‌ن و گووتاڵ خاسی ئاژنه‌و خوه‌ێ
بچڕ هووره‌ێ له قوڕن بێكــه‌سی دڵ
شمـــــــاڵ دارسانه‌یل لاونه‌و خوه‌ێ
***
چراخ گه‌وراێ وه نزێگ هاتێێه
مــــــاسی لیق قرمزێگ هاتێێه
مینگه نـــــه‌وارؤیه وڵات كه‌ڵهڕ
دوواره عــه‌ێد نه‌ورزێگ هاتێێه
***
له باڵاێ م چمان خه‌م لاریــــــــاسه
چــــــــه‌ود واران ئـــاگر وه م داسه
م یـه‌ێ عومره له ناومه‌رزان چووڵێ
هــــــه بێكه‌سی له لام داكــاسیاسه
***
وه‌ره‌و لاێ مه‌ڵوه‌ن داخه‌یل خه‌س چێ
وه‌لێـــــا چێ كونه‌ێ هؤرم بڕه‌س چێ
بزان دنیــا وه بێ چه‌و ت پـــــه‌شێوه
بزان دنیا وه بێ چه‌و ت له ده‌س چێ
***
د داوان چــه‌و مه‌س ئاهوو منیدن
گوڵ سه‌روێنه‌گه‌ێ لوو لوو منیدن
چراخ ئاسمـــــــــــــــانه‌یل بڵێنی
هه ت داڵاهوو و شـــاهوو منیدن
***
تاڵێگ مه‌چیرم و له فێر ت بڕیــــــامه
تــــــا عومر دێرم وه بێ چه‌ود له‌ێوامه
بێكه‌س له بن كه‌شه‌یل بانان گوم بؤم
دونیــــــا وه ته‌ماێ چه‌وه‌یل ت دانامه
مۆعین شاوەیسی
