وماواى خوه‌مان ده‌رمانكردن وه‌ناهه‌ق ، وتیانه‌قیمان ئیرانى و ته‌به‌عیه ، مه‌هانه‌ى فره‌یگ دروس كردیان ، یه‌یش ته‌نیا هه‌ر له‌وه‌ر ئه‌وه‌ك ئیمه كوردیم و خوداوه‌ند وه‌كورد دروسمان كرد و یه‌یش شه‌ره‌فه ئه‌ڕامان مقه‌یه‌تى له شوناسنامه‌و نه‌ته‌وه‌ى خوه‌مان بكه‌یم و له‌هه‌مان وه‌خت وه‌رگرى یا دفاع له‌لى بكه‌یم ك هیز و تواناو جه‌به‌رووتیان هه‌رچه‌نى بووگ ، وه‌ى جووره به‌ش ئیمه‌ى كورد له زوڵم فره بوى ...
وه‌دریژایى ده‌یه‌ها ساڵ سه‌ده‌ى وه‌رین ك وه تیه‌ڵى له‌بان ملله‌ت عراق وه‌گشتى چیه سه‌ر و ملله‌ت كورد وه‌تایبه‌ت ، ئه‌وه بوى گشتمان زانیم ك چه‌نیگ و تا چ ڕاده‌یگ رژیم ڕمیاگ مامڵه‌ى وه‌حشیانه وه‌لمانا كرد و هه‌میشه دژ ملله‌ت خوه‌ى پیسترین وه‌سیله‌یل تاوانكردن وه‌جه‌م و وه‌تاك هاوردیاگه كار له‌وه‌ر خاتر وه‌دیهاوردن مه‌رام گڵاو خوه‌ى ، ئه‌ویش ئه‌وه بوى ك دارو ده‌سه‌ى به‌عس دژ گشت كه‌سیگ وه‌پیسترین شیوه ره‌فتار كردیان وه‌بى جیاوازى له‌وه‌ك بویشن ئه‌یه مناڵه یا ژنه یا پیر په‌ككه‌فتگه.
له‌و هووكاره‌یله ك رژیم سه‌دام هاوردیاگه‌ى كار دژ وه‌ملله‌ت سته‌مدیده‌ى كوردمان ، ئه‌ویش سیاسه‌ت كووچ وه‌پیكردن و سه‌ندنه‌وه‌ى شوناسنامه بوى له هاووڵاتیه‌یل كورد له‌چین فه‌یلیه‌یل و ده‌ركردنیان وه‌ره‌و ئیران ، ك هه‌رچه‌نى له‌عراقیه‌یل ڕه‌سه‌نیش بوین . بیجگه ئه‌وه‌یش سیاسه‌ت وه‌عه‌ره‌بكردن ناوچه‌و شاره‌یل كوردى و ته‌هجیر مه‌ردمه‌گه‌ى و بردن و تاڵانكردن ماڵ و موڵكه‌گه‌ى له‌وه‌ر خاتر ئه‌وه‌ك نه‌ته‌وه‌ى كورد نه‌یلیگ و ناویان بكوشنیگه‌وه‌و یه‌كڕزى نه‌یلیگ له‌ناونى پیكهاته‌یل عراق . وه‌لى هه‌رچه‌نى بى ئه‌قڵى رژیم وه‌رین زیاتر بوى و هه‌رچه‌نى زوڵم و زوور خوه‌ى تاقیه‌و كرد ، ئه‌وه‌سه ئه‌و كورده‌یل خانه‌قى و مه‌نه‌لیه ك كووچ وه‌پیان كریا له‌شاره‌یل ره‌سه‌ن خوه‌یان دوباره گشتیان له‌ده‌ور یه‌كترى گرده‌و بوین له‌به‌غدا له‌شوونه‌یل جویر حه‌ى ئه‌لئه‌كراد و سه‌دریه‌و ئه‌بو سه‌یفێن و جاریگ تر زوان كوردى هاته‌وه.
كورده‌یل ئاواره‌و ده‌ركریاگ له‌شوون ماواى خوه‌ى ، ده‌رد و مه‌ینه‌تى و ئاره‌زوویان ئاشكراس و تویه‌نیم ناو ئه‌و وه‌خته‌یل پڕ له‌كیشه‌و گرفته بنه‌یم وه‌خت تیه‌ڵى ك هاتیاگه بان مه‌ردم كورد وه‌ده‌س داروده‌سه‌ى سه‌دام و یاوه‌ره‌یلیان له‌تاوانباره‌یل ، هه‌ر له‌وه‌ر ئه‌وه‌یش شه‌فه‌ق سه‌ردان چه‌ن شوونیگ كرد و له‌وانه‌یش : حه‌ى ئه‌لئه‌كراد و ناوچه‌ى قشڵ و جاده‌ى كیفاح كرد و چه‌وى كه‌فته مه‌ردم كورد نیشته‌جاى ئه‌و شوونه‌یله ك خه‌ڵك خانه‌قى و مه‌نه‌لى و شاره‌یل تر كورد ته‌عریبكریاگن ، له‌لیان بوى و خاڵك مه‌نه‌لى و یادگاریه‌یل منه‌لى و باواڕ بویچگ كه‌فتیاگه هویرى ك رژیم سه‌دام سه‌به‌ب دویره‌خستنى بویه له‌و شوونه‌یل ره‌سه‌ن كورده‌وارى خوه‌یه‌و ئیسه‌یش وه‌ختى ناو ئه‌و شوونه‌یله ژنه‌فن له‌لیان هه‌س ئه‌سر چه‌و ڕشنن و باس له یادگاریه‌یل ئه‌وساى خوه‌یان كه‌ن ك له‌چ به‌هه‌یشتیگ بوینه‌و خوه‌شگوزرانى داشتنه . هه‌ر له‌وه‌ر ئه‌وه‌یش خه‌ڵك مه‌نه‌لى داواكارن له حكوومه‌ت هه‌رێم كوردستان ك بتویه‌نیگ ده‌س خزمه‌تگوزارى و ئاوه‌دانى بڕه‌سنیگه شاره‌گه‌یان تا بتویه‌نن بانه‌وه ئه‌را زێد و ماواى باوگ و باپیره‌یلیان و ئه‌وباقى عومریان له‌ورا وه‌خوه‌شى بووه‌نه سه‌ر.
خه‌ڵك شاره‌گه باس له‌وه كردن ك چوین پاسه‌وان كوومارى(الحرس الجمهوری) ئه‌وسا هاتنه‌سه ئاوایى قه‌ره‌وڵس و مه‌ردمه‌گه‌ى ناچار كردنه بار بكه‌ن و هه‌رچى دیرن بیله‌نه‌ى جى ، ئه‌یه بیگومان یادگارى تیه‌ڵیگه له‌ژیان كورده‌یل ، چوینكه باركردنیان له‌ناكاو ده‌س وه‌پى كردگه وه‌بى ئه‌وه‌ك زویتر سه‌ره‌ساویان كردوین تا ئاماده‌ى خوه‌یان بكردان ، ئه‌وه بوى ئه‌و كورده‌یله خانه‌قى و مه‌نه‌لیه خریانه ناو سه‌یاره‌یل عه‌سكه‌رى و جیواز كریان ئه‌را ناوچه‌یل جیاجیاى عراق و سه‌ره‌تاى ژیان له‌و ناوچه‌یله ئه‌رایان تیه‌ڵى فره‌یگ داشت و له‌وانه‌یش تیه‌ڵى دویره‌و كه‌فتن له‌زێد و ماواى ره‌سه‌ن خوه‌یان . ئه‌و ماڵ و موڵكه‌یلیشه بویه قسمه‌ت كه‌سه‌یل تر بیگانه‌و نیشتنه بان حازرى . ئمجا ئایا دویاى ئه‌و هه‌مگه ده‌رده‌سه‌ریه جاریگتر ئاره‌زووه‌یلیمان تیه‌یگه‌دى و له‌خه‌م و مه‌ینه‌تى ده‌ربچیم خاسه.
