بوينه‌سه دڕنده‌و ته‌نيا هوير له‌تێكداين و كوشتن و شيوانن ژيان ده‌روه‌ر كه‌ن و هه‌ر وه‌سه‌به‌ب ئی كه‌سه‌يله‌وه به‌شيگ له‌مه‌ردم دوچار كوشتن و ده‌روه‌ده‌ری و ماڵويرانی هاتنه‌و ژيانيان بويه‌سه دوزه‌خيگ هه‌ميشه‌يی ، ك بوينه‌سه چه‌ن گروپ وتاقميگ ويرانكه‌ر و له‌خوه‌يانا مه‌ردم وه‌كوشتن و ته‌قينه‌وه‌و ده‌روه‌ده‌ركردن له كفرونيفاق پاكه‌و بووگ و بوينه‌سه په‌يامهاوه‌ر ئاشتی ئه‌را ئه‌و مه‌ردمانه ك وه‌دريژايی تاريخ ژيان زوڵم له‌ليان كردگه و گرفتار ده‌س فه‌قيری ونه‌داری و حوكم ناڕه‌واو دكتاتۆريانه‌ی ئاده‌ميزاد وسروشتن .
نموونه‌ی ئه‌و كوومه‌ڵگايه‌يل ويران ودوياكه‌فتگه‌يله له‌ناو ئمڕوو دونيای پيشكه‌فتن و ته‌كنۆلۆجيه ئه‌وه‌نه ئاشكران ته‌نيا هويره‌وكردن كه‌ميگ به‌سه ئه‌را زانستن و ده‌سناين له‌بان زه‌خمه‌يليان ، ئمجا وه‌حوكم جوگرافياو سروشت و سروشت دروسبوين فكرو ئه‌قڵ تاك ناو ئه‌و كوومه‌ڵگايه‌يله ژيان سه‌خته‌و ئازادی و رووشنهويری و هووشياری تاك تا تيه‌يگ وه‌ره‌و دويا چووگ وه‌چه‌واشه‌ی زوورم كوومه‌ڵگايه‌يل پيشكه‌فتگخواز دونيا ك فره وه‌گورجی وه‌ل ته‌كنۆلۆجياو چشته‌يل تازه‌وه خه‌ريك خودگونجيانن .
كوومه‌ڵگای عراقی يه‌كيگه له‌و كوومه‌ڵگايه‌يله ك جوگرافياو فه‌رمانڕه‌وايه‌يل وه‌دريژايی تاريخ خستنه‌سه‌ی ژير چه‌قو مه‌رگه‌وه ، وه‌ل ئه‌وه‌يشا له‌شوون كووتاييهاوردن وه حوكم دكتاتۆريه‌ت و خوه‌زگه وه‌ئازادی و ژيانيگ ئاسووده هيمان خه‌ڵك ئی وڵاته رووژ له‌دويای رووژ له‌ژير گورز فه‌قيری و ماڵويرانی ناڵنن ، وڵاتيگ خاوه‌ن سامان سروشتی ئه‌وه‌نه فره‌س نه‌ك وه‌ته‌نيا وڵاتيگ ، به‌ڵكوو حوكم ده‌يه‌ها وڵات فه‌قيرحاڵ وه‌پی كريه‌يگ ، ك ته‌ماشا كه‌يد وه‌چه‌واشه‌وه رووژ له‌دويای رووژ وه‌سه‌به‌ب هوير كويه‌ن و دوياكه‌فتگ چه‌ن تاقم و گرووپيگه‌وه بويه‌سه يه‌كيگ له دوياكه‌فتگترين و فه‌قيرترين پارچه‌ی بان ئی گووشه‌ی زه‌ويه ، ك وه‌جووريگ هه‌رچی بازرگانيكردن ناشه‌رعی و نائنسانيه هه‌س وه‌گيان دويه‌ت و ژن و مناڵ ئی وڵاته كريه‌يگ و رووژ نيه ده‌يه‌ها ژن روی وه روی كوشتن و ده‌سدريژی نه‌وگه‌وه ، دويه‌ته‌يل ئی وڵاته وه‌ك كاڵا بازرگانه‌يل ئی ده‌س وئه‌وده‌س وه‌پيان كه‌ن ، مناڵ ئی وڵاته له‌بازاڕ بازرگانه‌يل سه‌ندن وفرووشتن وه‌پيان كريه‌يگ ، شماره‌ی بيوه‌ژن و يه‌تيم و بيكار وفه‌قير له‌راده ده‌رچيه ، وه‌ل ئه‌وه‌يشا هيمان وژدان ئنسانيه‌ت نيايگه ژان و سه‌ركرده‌يل گيرفان قويل و دكتاتۆره‌يل ئی وڵاته هويچ خه‌ميگيان نيه‌خوه‌ن و ته‌نيا هويريان ها لای گيرفان خوه‌يان و لای كورسی و دزی و هه‌وه‌س خوه‌يان و دی مه‌ردم فه‌قيرو كه‌مده‌سيش هه‌رچی وه‌پی بايگ بيلا بايگ .
ئمجا خانم (ئه‌نجيلينا جولی) ك ئه‌ساره‌يگ ناودار سينه‌مای جه‌هانيه ك نه وه‌ڕه‌گه‌ز عه‌ره‌به‌و نه‌يش هه‌ڵگر هويروڕای ئسلامه ، وه‌ل ئه‌وه‌يشا ژنيگ ئايه‌مدووسه‌و تائيسه چوار مناڵ له‌وڵاته‌يل فه‌قير كرده‌سه مناڵ خوه‌ی و دڵسووزانه وه‌ك دايگيگ ميهره‌بان وه‌ل هاوسه‌ره‌گه‌يا (براد بيت) ئمايه‌تيان ئه‌كاو نيه‌ت ئه‌وه ديريگ دويه‌ته كورپه‌يگ عراقييش بكه‌يگه مناڵ خوه‌ی . بيگومان ئی خانمه وه ڕه‌گه‌ز ئه‌مريكيه‌و بويه‌سه هاوخه‌م ئه‌و خيزانه‌يل عراقيه ك له‌ترس ورسگی و كوشتن و بڕين وڵات خوه‌يان هيشتنه‌سه جی و روی كردنه‌سه وڵات سوورياو ئوردن و مسر .
