نازێ عه‌زیزی: شايه‌د دی وه‌كوردی گورانی نه‌چڕم
لە دیدارێگی وه‌ل كه‌ناڵ ئێن ئاڕ تی 2، نازێ لەربارەی مێدیای هونەر کوردی قسه كردگه و وتگه"مێدیای کوردی جوور مافیا وه‌پێهاتگە، گشتیان بوينەسە گروپ گروپ، هەر مێدیايگ و گروپ هونەری خوه‌ی ديرێ و لە گشت بوونەگان هەر ئەو گروپه‌يله‌نە، هەميش مێدیای کوردی گرنگی وە کەسه‌يلێگ ئەياد ک شایه‌ن ئەو گرنگیە نین، گرنگی وە کەسانێگ نادەن ک فره موستەحەقن".
هه‌ميش وت ک بوين پاسپۆرت ئەوروپا فره گرنگە له‌لای وه‌رپرسه‌یل مێدیای کوردی "گرنگی وەو هونەرمەنده‌يلە ئەيەن ک هانە ئەوروپا، هەرچەن ئەوان جوور گارسۆن و قاپ شوور و سایەق تەکسی لەوره كار کەن".
وتیش "من زانیاری ها لام ك چەن کەناڵێگ جوور کوردسات و زاگرۆس ئه‌ڕا ئی جەژن نەورووزە، چەنه‌ها هونەرمەند لە ئەوروپاوە داوەت کردنە وە بڕە پويليگ فره، تەنيا لەوەر ئەوەگ پاسپۆرت ئەوروپی ديرن، من پاسپۆرت ديرم، وه‌لی فڕه‌ی دامە".
وه‌خاتر ئەو نگەرانیه‌يلە ك باس له‌ليان کرد، نازێ وت ك نگەرانە و شايه‌د وە کوردی گورانی نەچڕێ، وه‌باوه‌ڕ ناوبرياگ وه‌ختێگ 2 گورانی وە زووان فارسی چڕيە، چه‌نه ئەو 10 ساڵە زیاتر سوود داشتگە ک لە کوردستان کار هونەری کردگە.
ا. ج
