دووارە دەنگ ئاواز لە ماڵ ئۆپڕای ڤێێنا بەرزەوبوی، وە هاتن چەن کەسیگ ک چووچیانە ناو هۆڵە گەوراگە، جوور رێزگردنیگ ئەرا رێسایل دویرەوکەفتن کۆمەڵایەتی.
کراسەیل دڕودریژ و وینەیل سێلڤی لەبان پلە دریژەگە دیاری نەوی، ک دویای سێ مانگ لەبان بەسانن ماڵەگە لەوەر پەتای کۆڕۆنا، میوانەگان پاککردنەوەی دەس وه‌پی كردن، لە جیای نووشەیل ئەوسا، و دەمامەک نان، تا بچنە ناو ئەو بینای فرە وازە، ک جوور کەلاوەیگ دیاردا، وەتەنیا هاتن سەد کەس، له‌وەختیگ خوەی ١٧٠٠ کەس گری.
دۆمینیک مییر وەڕیەوبەر ماڵەگە ئاماژەدا؛ ک جی خەفەتە هەل کردن گورانی ئەرا هونەرمەندیلیگ وەی ئاستە، ئەرا تەنیا سەد تەماشاکەر.
وتیش؛ ماڵەگە دەرەگانی وازکرد، وەبی بەرزەوبوین لە نرخ کاتەیلە، جوور هاندانیگ ئەرا روشنهویری ک سیاسیەیل جهان خەنەی پشتگووش.
ماڵەگە ناچاربوی لەبان پویچەڵ کردن ١٢٠ هەل كارلەوەر پەتای کۆڕۆنا، ک ئەوسا پێشوازی وە ٦٠٠ هەزار میوان لە ساڵیگ کردیاد، ولەوەخت جیگردن ئەرا ئی هەل نووە لە ماوەی نیم ساعەت گشت کارتەگان فروشیا.
نەمسا لە کۆتایی مانگ ئایار وەرین، ره‌زامەنیدا وە هەڵسیان وەبونە روشنهویریەگان، وەلی ئەرا تەنیا سەد کەس لەناوی، وتەگبیرە ئی ژمارە بوودە ٢٥٠ کەس لە تەمووز هاتگ.
ئۆلڕیکە گرۆنڤاد (٥٧ ساڵان) ک لەفەڕەنسا نیشتگە وت؛ چیمە ژیر تاقیکردن لە پەتا و ماشینەگەم تا ماوەی ١٦ ساعەت رانیم تا بڕەسمە ئی هەلە وەل دویەتەگەم، وتیش؛ من فرە دڵخوەشم، ئەگەر کەسیگ خوەشی لە روشنهویری باد بایەسە ژیانی بکەێد، و من ١٠٠ یۆڕۆ دامە کارتەگە.