شەفەق نیوز/ پارێزگای سەڵاحەدین، ئمڕوو دووشەممە، داوای فریاکەفتن لە حکومەت و وەزارەت تەندروسی کرد، ئەرا پشتگردنی لە نواگردن بڵاوبوین ڤایڕۆس کۆڕۆنا، دویای زیایبوین تووشهاتنەگان، و هووشداری دا لە دەرچگن رەوشەگە لە ژیر کۆنتڕۆڵ.
محمد بەلداوی نوێنەر پارێزگاگە لە پەڕلەمان عراقی، ئەرا ئاژانس شەفەق نیوز وت: سەڵاحەدین زیایبوین فرە و مەترسیداریگ وە ژمارەی تووشهاتنەگان ڤایڕۆسەگە وە خوەی دوینێد، لەوەر بڕیگ هووکار، زاقتریان پرتکبوین کەرتە تەندروسیەگە و نەمەنی پشتگیری و کەمی پێویستیەگان و ئامێرەیل هەناسه‌دان و هەمیش خەمسەردی هاووڵاتیەیل وەگەرد پاتاگە و نا پابەندی وە ریکارە مقەیەتی تەندروسیەگان.
وتیش؛ باوەت کۆرۆنا لە پارێزگاگە چیە ناو دوڕیان مەترسیداریگ دویای زیایبوین تووشهاتنەگان، وه‌ تایبەت لە قەزاگان دجێل و بەلەد و شەرقات، تەنانەت شار تکریت ناوەند پارێزگاگە، ک هیشت وەرپرسەیل کەرتە تەندروسیەگە پەنا وە هاووڵاتیە دەوڵەمەنەگان بوەێد ئەرا پشتگیری خەسەخانەگان و ناوەندە تەندروسیەگان وە ئامێر و پێویستیە تەندروسیەگان.
بەلداوی لە ئاماژەی کاریگەری کۆڕۆنا لە پارێزگاگە وت: خەڵک دجێل لە خۆپیشاندانەیل هیمان ری تکریت و بەغداد بڕینە، و داوای رزگارکردن رەوشە تەندروسیەگە کەن، و پەیاکردن چارەسەری زوینە ئەرا قەیرانە تەندروسیەگە، وهەمیش شێخەیل هووزەگان تکریت بەیاننامەیگ ئەرا فریاکەفتن ئاڕاستەکردن، وەپی هووشداری دان لە زیایبوین تووشهاتنەگان کۆڕۆنا، و گرنگی لە بردن ریکارەیلیگ گونجیاگ ئەرا رزگارکردن خەڵک پارێزگاگە لەی پەتا، و گیرهاوردنی وەگورەی توانا.
نوێنەرەگە داوای دروسکردن شاندیگ فەرمی کرد، وچەوپیکەفتن وەل حکومەتەگە ئەرا چارەسەری و رزگارکردن رەوشە تەندروسیەگە لە سەڵاحەدین، و دروسکردن دەسەیگ ئەرا پەیوەندی وەگەرد دامەزراوە تەندروسیەگان، و نووڕستن لە خوازین و گرفتەیلی ئەرا نواگردن قەیران کۆڕۆنا.
جی باسە؛ سەڵاحەدین لە ماوەی هەفتەیل گوزەیشتە هەڵقوڵان گەورایگ وە هەژمار تووشهاتگەیل کۆڕۆنا تۆمارکرد، له‌ ناونی ٧٠-١٢٠ تووشهاتن لە رێژەی رووژانە، دویای ئەوەگ لە ماوەی مانگ ئادار تا ئایار گوزەیشتە پەتا لەناوی نەوی.