محه‌مه‌د عه‌لاوى ميكانيزم كانديدكردنى له 170 په‌رله‌مانتاره‌و ده‌رخست
شه‌فه‌ق نيوز/ محه‌مه‌د عه‌لاوى سه‌رۆك وه‌زيره‌يل تازه‌ى راسپارياگ ئه‌را دامه‌زرانن حكومه‌ت تازه‌ى عراقى، ئاشكراى ئه‌وه كرد 170 په‌رله‌مانتار سه‌روه‌خوه‌ى كانديدى كردنه ئه‌را ئى پۆسته له‌وه‌ر جواودانه‌وه‌ى داواكارى خوه‌ينيشانده‌ره‌يل و داوايش له خوه‌ينيشانده‌ره‌يل كرد گشت ناكووكيه‌يليگ بخه‌نه كنار و رێ وه‌چگنه‌وه وه‌ره‌و دويا نه‌يه‌ن.
عه‌لاوى له بڵاوكرياگيگى له فه‌يسبوك وت: ئمڕوو خوه‌ينيشانداين ئه‌نجامه‌يل خاسيگ وه‌ده‌سهاوردن وه ره‌تكردنه‌وه‌ى زوورم ئه‌و سياسيه‌يله ك وڵات ره‌ساننه ئى حاڵه‌ته ئيسه‌يه، ئه‌ويش خوه‌ى له ده‌سكه‌فتيگ ديه‌و ئه‌را داناين ياساى تازه‌ى هه‌ڵوژاردنه‌يل و هه‌كه‌فت تازه‌يگ ئه‌را كۆمسيۆن هه‌ڵوژاردنه‌يل بيجگه ره‌تكردنه‌وه‌ى كانديد حزبه‌يل ئه‌را پۆست سه‌رۆك وه‌زيره‌يل.
عه‌لاوى هه‌ميش وت: له‌ئه‌نجام ئه‌و داواكارييشه بڕيگ له ئه‌ندامه‌يل سه‌روه‌خوه‌ى ك شماره‌يان ره‌سيه نزيكه‌ى 170 ئه‌ندام جواو داواكارى خوه‌ينيشانده‌ره‌يل دانه‌وه‌و په‌نج ناو هه‌ڵوژانن له‌و ناوه‌يله ك خرياڕوێ وه‌ل داناين ره‌سمه‌يليان له مه‌يدانه‌يل خوه‌ينيشانداين و ئه‌و ئه‌ندامه‌يله راپرسييگ له‌ناونى خوه‌يان كردن له‌بان ئه‌و ناوه‌يله‌و زوورميان ناو محه‌مه‌د ته‌وفيق عه‌لاوى هه‌ڵوژانن، ئمجام محه‌مه‌د عه‌لاوييش وه ڕاسى نوێنه‌ره ئه‌را خوه‌ينيشانده‌ره‌يل ئاشتيخواز.
