شەفەق نیوز/ پسپۆرەیل وبەرپرسەیلیگ ناوخۆی، لە پارێزگای دیالە دەسخوەشی لە بڕیار پارێزگای دیالە کردن، ئەرا قەیەغەی هاوردن بەرهەمەیل کشتوکاڵ، وەیە وه‌ گامیگ گرنگ دانانەی ئەرا زنی بوین کشتوکاڵ، وئەوزەڵکردن گوزران ئەرا فرەیگ لە کشاوەرزەیل پاریزگاگە.
دویەکە سێشەممە، پارێزگای دیالە بڕیار دا، ک کارکردن عەلوەیل سەوزە ومیوە فروش تەنیا ئەرا ئەوانەس ک موڵەت دیرن، لە ٣٠ نیسانەو، ئه‌را پشتگیری لە بەرهەم ناوخۆ بکەێد ، قەیەغەی هاوردن ( خەیارو بایمجان و کویلەکە ) لە دەیشت عیراق ئەرا بازاڕه‌یل دیالە كریا.
عەبدل جەبار عوبەیدی وەڕیەبەر ناحیەی عزێم ئەرا شەفەق نیوز وت: بڕیار پارێزگاگە وە قەیەغە کردن سەوزە گرنگەگان، زینگ گوزران روژانەی زیاتر لە ٧٥% لە جوتیارەیل دیالە کەێد، وهانیان دەێد وەرەو زیادكردن بەرهەم خۆماڵی.
وتیش: بڕیار وەرەوبەڕایەتی دیالە وە ‌قەیەغەی هاوردن بەرهەمەیل گرنگ کشتوکاڵ وەرزی، بڕیار ئازایانەیگە، داهات دارایی گەورایگ لە ئابوری ناوخۆ مسۆگەر کەێد، وچەنها ساڵ لە دڵشکانن جوتیارەیل وکەم کارییان وە پڕکردن بازاڕ وە چشت هاوریاگ تیمار کەێد.
و لای خوەییش نەجم سەعدی وەڕیەوبەر ناحیەی بەنی سەعەد ئەرا شەفەق نیوز وت: هاوردن بەرهەمەیل لە دوەڵەتەیل هاوسا بازاڕ ناوخۆی خنکنێد، و ئابوری دیالە ویران کەێد، وهەزاران کشاوەرز زەرەد گەورایگ لەو روژەیل وەرینە وە داوەزیان نرخ سەوزە دین، ک بیە خوراك ئاژەڵ. وتیش بڕیار قەیەغەی هاوردن سەوزە گیرفان ٨٠% لە جوتیارەیل لە بڕیگ لە ناوچەیل پارێزگاگە پڕەو کەێد، تایبەت ئەوانەیگ لە وەرزەیل کشتوکاڵ وە سەوزەو میوە سپۆنسەر دیالە و بڕیگ لە پارێزگایل کەن.
لای خوەییش رافد ئیبرایم پسپۆر ئابوری ئەرا شەفەق نیوز وت: پارێگای دیالە هەر ساڵیگ ٨٠% لە جوتیارەیلی وازتیه‌رن، وە هۆی پڕ بوین بازاڕ وە بەرهەم هاوریاگ، و زیان گەورایان هیلیگەیان بچنە شوون کارەیل تر.