ته‌له‌فزيۆن: هه‌ڕه‌شه‌ى كوشتن له حه‌لبوسى كرياگه
شه‌فه‌ق نيوز/ كه‌ناڵ ئه‌لعه‌ره‌بيه ئاشكراى ئه‌وه كرد وه‌رجه هه‌فته‌يگ كه‌سه‌يليگ له حزبوڵڵاى عراقى هه‌ڕه‌شه‌ى كوشتن له محه‌مه‌د حه‌لبوسى سه‌رۆك ئه‌نجومه‌ن نوێنه‌ره‌يل كردنه وه بوونه‌ى هه‌ڵويستى له‌باره‌ى ناكووكيه‌يل ناونى ئه‌مريكاو ئيران.
وه‌گووره‌ى ته‌له‌فزيۆن فه‌رمى سعوديه، ئه‌وه ده‌ركه‌فت ك كه‌سه‌يليگ له‌و حزبه تويه‌نستنه نامه‌يگ وه‌هه‌ڕه‌شه‌ى كوشتن و وه دروشم و موور حزبوڵڵاى عراق كلبكه‌ن له‌ڕێ نواگرتن له سه‌ياره‌ى سكرتێر حه‌لبوسى له يه‌كيگ له جاده‌يل به‌غداى پايته‌خت و داوا له‌لى كردنه نامه‌گه ته‌سليم وه سه‌رۆك ئه‌نجومه‌ن نوێنه‌ره‌يل بكا.
ئه‌لعه‌ره‌بيه وت: ئه‌و كه‌سه ك نوا له سه‌ياره‌ى سكرتێره‌گه‌ى حه‌لبوسى گرتگه ناوى ئه‌بو حه‌يده‌ر بويه‌و يه‌كيگ بويه له سه‌ركرده‌يل حزبوڵڵاى عراقى.
يه‌يش له‌وه‌ختيگه زويتر سه‌رۆك ئه‌نجومه‌ن نوێنه‌ره‌يل جه‌خت له ئاماده‌گى وڵاته‌گه‌ى كرد له‌نوو ناوه‌ندگيرى بكا له‌وه‌ر خاتر چاره‌سه‌ر كيشه‌ى ناونى وڵاته‌يل يه‌كگرتگ و ئيران و له‌تى حه‌لبوسى وت: به‌غدا ئاماده‌س ناوه‌ندگيرى بكا له‌ناونى ته‌هران و واشنتۆن، وه‌لێ هويچكام له‌و لايه‌نه‌يله ئه‌و كاره وه شيوه‌يگ فه‌رمى نه‌خواستن.
