شەفەق نیوز/ رەجەب تەیب ئۆردوگان سەرۆک تورکیا، ئمڕوو جومعە، باس لە ئامادەبوین وڵاتەگەی کرد ئەرا پشتگیری عیراق لە بوارەیل سیاسی و ئەمنی و ئابووری، وئاشکرای ئارازو خوەی کرد ئه‌را سەردان بەغداد لە نزیکترین دەرفەت. یەیش لە پەیوندی تەلەفۆنییگ له‌ ناونی موستەفا کازمی سەرۆک وەزیران عیراق وه‌ل ئۆردوگان باس كریاس، وەگوری بەیاننامەیگ لە حکومەت عیراق.
ئۆردوگان پیروزبایی لە کازمی کرد وبونه‌ی وەرگردن سەرۆکایەتی حکومەتەگە، ودووپاتە لە ئامادەبوین تورکیا کرد ئه‌را پشتگیری سیاسی و ئەمنی و ئابووری عیراق.
ئۆردوگان ئاماژە کرد ک نیاز سەردان بەغداد دیرێد لە نزیکترین دەرفەت ، ئەرا گفتوگو له‌بان ریەیل بتەوکردن پەیوەندیەیل لە چوارچێوەی رێککەفتنە دوقۆڵیەگان و رێزگردن هەردگلا له‌ سەبەخۆیی و یەکێتی خاك هەردگ وڵات.
لای خوەیەو، کازمی سوپاس لە پێروزباییەگەی سەرۆک تورکیا کرد ، و دووپاتیش کرد ک عیراق لەبان بنەمایەیل بڕوا و رێز هەردگلا، نیاز بونیادنان پەیوندیەیل هاوبەش وەهێزتر وەل تورکیای هاوسای دیرێد،.
کازمی هەمیش وت؛ مایەی دڵخوەشیە ک پێشوازی لەلید بکەیمن لە بەغدا، و وەردەوامی سه‌ردانەگان وەو شێوە ک هۆکاربوود ئەرا فراوانكرن پەیوەندی هەردگلا. بەیاننامەگە باس کرد ک هەردگ لاینەگە باس بەشە ئاوەگان ناوبەین هەردگ وڵاتەگە کردن، وریەیل بتەوکردن جویلەی بازرگانی و وەبەرهێنان، ودەور کۆمپانیایه‌ل تورکی لە باوەتەیل وزە و ئاوەدانی، وئاسانکاری جموجویل هاوڵاتیەیل ناوبەین هەردگ وڵاتەگە، ورێککەفتن لە روی قەیران کۆڕۆنا.