شه‌فه‌ق نيوز/ سه‌رچه‌وه‌يل باس له‌وه‌ كردن عه‌سايب ئه‌هل حه‌ق و حزبوڵڵاى عراقى وه‌ ته‌واوى ده‌س گرتنه‌سه‌ بان قه‌زاى ته‌لعه‌فه‌ر له‌ پاريزگاى نه‌ينه‌وا.

له‌و باوه‌ته‌و، ئه‌لعه‌ره‌بى ئه‌لجديد له‌ زووان سه‌رچه‌وه‌يل ناوچه‌يى وت: عه‌سايب ئه‌هل حه‌ق و حزبوڵڵاى عراقى وه‌ ته‌واوى ده‌س گرتنه‌سه‌ بان قه‌زاى ته‌لعه‌فه‌ر دوياى ئه‌وه‌گ كريا شوونيگ سه‌ر وه‌ هيزه‌يليان و ته‌نانه‌ت له‌يوا ووه‌پى هات ك مه‌ردم ئاوايه‌يل نزيك له‌ ته‌لعه‌فه‌ر مه‌حاڵه‌ بچنه‌و ئه‌را شوونه‌يليان ك بويه‌سه‌ سه‌ربازگه‌و شوون جه‌مه‌وكردن چه‌ك و ته‌قه‌مه‌نى.

وه‌گووره‌ى ئه‌و سه‌رچه‌وه‌يله‌، ئمڕوو ته‌لعه‌فه‌ر بويه‌سه‌ سه‌ندوقيگ به‌سياگ يا سه‌ربازگه‌يگ گه‌وراى حه‌شد شه‌عبى و باس له‌وه‌يش كرد ك حكومه‌ت به‌غداو نه‌ينه‌وا كزن له‌باره‌ى بڕيارداين له‌باوه‌ت ئه‌وه‌گ له‌ ته‌لعه‌فه‌ر روێ ئه‌ياد، چوينكه‌ حوكم ئيسه‌ له‌ورا هاده‌س فه‌سيله‌يل حه‌شد شه‌عبى.