"میر جه‌عفه‌ر یه‌كم" دونبولى چوين مرد؟
شه‌فه‌ق نيوز/ میر جه‌عفه‌ر یه‌كم دونبولى مه‌رام له‌لى"جه‌عفه‌ر كوڕ یه‌حیاى به‌رمه‌كى"ه، ك بڕيگ سه‌رچه‌وه باس له‌وه ئه‌كه‌ن گوايا وه‌زیر هاروون ره‌شید بویه، وه‌لى ئى هه‌واڵه تاڕاده‌يگ راس نيه‌و جى گومانه.
سه‌رچه‌وه‌يليگيش باس له‌وه ئه‌كه‌ن ك جه‌عفه‌ر به‌رمه‌كى هویچ وه‌ختیگ دونبولى نه‌ویه‌و ئه‌گه‌ر كوردیش بویه، ئه‌وه جوور ئه‌وه‌گ له كتاو "شه‌ره‌فنامه"ى شه‌ره‌فخان بدليسى ئشاره‌ت وه‌پى كریاگه له‌كورده‌یل كویه‌ن ده‌ورگرد خوه‌راسانه له وه‌رجه سه‌رده‌م ئسلام.
ئه‌گه‌ریش وه‌گووره‌ى مه‌زه‌نه‌و باوه‌ڕ نویسه‌ره‌یل بوود، ئه‌وه جه‌عفه‌ر دونبولى بایه‌سه میر جه‌عفه‌ر كوڕ میر حه‌سه‌ن بوود، ك له ساڵه‌یل (226 – 227 ك) دژ موعته‌سه‌م خه‌لیفه‌ى عه‌باسى هه‌ڵسیاو مه‌ردم فريه‌یگ كه‌فته شوونى و موعته‌سه‌میش" عه‌بدوڵڵاى ئه‌زدى " كلكرد ئه‌ڕا موسڵ و داوا له‌لى كرد بكه‌فیده جه‌نگه‌و، جه‌عفه‌ریش له‌ى وه‌خته له( مانعێس )بوى و عه‌بدوڵڵا له‌بانى زاڵ بوى و مانعێس له‌لى داگیر كرد.
ئمجا جه‌عفه‌ر په‌نا برده كویه‌ى" داسن "و له‌ورا مه‌ند، وه‌لى عه‌بدوڵڵا ئه‌زدى هه‌ر كه‌فته شوونى و جه‌عفه‌ریش هیز فريه‌یگ گرده‌و كرد و هيز عه‌بدوڵڵا شكیان و به‌ش فريه‌یگیش له له‌شكره‌گه‌ى له‌ناو برد و بڕیگیش له‌لیان ده‌سگیر كرد، یه‌كیگ له‌وانه‌یش" ئسحاق كوڕ ئه‌نه‌س"بوى، ك مامه‌ى عه‌بدوڵڵاو خه‌سویره‌ى خود جه‌عفه‌ر بوى و گشتیانيش كوشت.
له‌شوون ئه‌وه‌يش ك وه‌ختیگ ئى هه‌واڵه ره‌سیه "موعته‌سه‌م " ئه‌ویش فه‌رماندا " ئیتاخ " له‌وه‌ر ئه‌وه‌گ وه له‌شكریگه‌و په‌لامارى بيه‌ێد، ئمجا وه هه‌رحاڵ ئه‌و په‌لاماره ئه‌نجام دریاو "ئیتاخ"یش وه له‌شكر فريه‌یگه‌و ده‌وریان داو ده‌سكرده كوشتن كورده‌یل و مه‌ردمان فريه‌یگ له فه‌قیرو بیده‌سڵات كورد وه‌ديل گيريان و ڕه‌وانه‌یان كريا ئه‌را تكریت و(جه‌عفه‌ر)یش ده‌رمانخوارد خوه‌ى كرد و سه‌ر ئه‌ڕایان نه‌چه‌مان.
مه‌لا جه‌ميل
