فه‌رمانڕه‌وايى "بابلول" و حه‌سه‌ن باوگى له كوردستان
شه‌فه‌ق نيوز/ ئيمه سه‌ره‌تا بايه‌سه ئه‌وه بزانيم ك حه‌سه‌ن كييه‌و چه‌ن ساڵ خاوه‌ن ده‌سڵات بويه. حه‌سه‌ن كوڕ خدر دويه‌م كوڕ ئه‌لياس كوڕ خدر بويه ك يه‌ك له‌شوون يه‌ك جڵه‌و فه‌رمانڕه‌وايى گرتنه‌سه ده‌س.
حه‌سه‌ن وه هوير تيژ و ڕی وشوون په‌سه‌ن، ياسانامه‌يگ ئه‌را كاروبار وڵات و له‌شكر نويسا، ئه‌ويش وه جووريگ ك هه‌ر يه‌ك له ئه‌ندامه‌يل له‌شكر و وه‌ڕيه‌وبه‌ره‌يل وڵات مه‌رز جموجويل خوه‌يان بزانن.
له ڕزه‌يل له‌شكر بڕێگ له جايه‌ڵ جوانه‌يل مه‌مڵه‌كه‌ت هه‌ڵوژان ك شماره‌يان فيشتر له ٣ هه‌زار كه‌س بوی و له‌وه‌ر خاتر په‌روه‌رده‌كردنيان هه‌وڵ فراوانيگ داو ناويان نا"پاسه‌وانه‌يل وڵات"و گرينگی تايبه‌تيگ وه‌پيان دا.
گشت شه‌و و ڕووژيگ ئه‌و ٣ هه‌زار كه‌سه ميوان بان سفره‌ی به‌خشنده‌يی حه‌سه‌ن بوين، ئمجا چه‌ن جاريگيش ك حه‌سه‌ن وه‌ل سه‌ردار و سه‌ركرده‌يل له‌شكری ده‌وڵه‌ت عوسمانی هاته جه‌نگ، وه بوونه‌ی ئی شماره‌ی جايه‌ڵ جوانه‌يله‌و ك په‌روه‌ده‌يان كردوێد ناوداری خاسيگ په‌يا كرد و له هويچكام له‌و جه‌نگه‌يله چشتيگ نه‌كه‌فته چنگ ئه‌و سه‌ركرده‌يل عوسمانيه.
له‌ساڵ ٧٧٤ كووچی، قه‌ڵای فريه بته‌ويگ له‌بان كويه‌يگ ك ئه‌كه‌فێده دويری يه‌ك فه‌رسه‌خ له شار سنه‌ی ئيسه دامه‌رانن، له باكوور قه‌ڵاگه ئاواييگ دامه‌زرانن و ناو قه‌ڵاو ئاوايه‌گه‌يش نا "حه‌سه‌ن ئاوا" و تائيسه‌يش شوونه‌وار ئه‌و قه‌ڵاو ئاواييه له خوه‌رهه‌ڵات كوردستان ديارن.
حه‌سه‌ن ئه‌را ماوه‌ی ٣٨ ساڵ وه گشت ده‌سڵاتيگه‌و له قه‌ڵه‌مڕه‌ويه‌گه‌ی خوه‌ی ژياو له ره‌بيعولئه‌وه‌ل ساڵ ٧٨٤ كووچی دونيای فانی وه‌جيهيشت و ماڵئاوايی يه‌كجاری كرد.
دوياى مردن حه‌سه‌ن، بابلول كوڕى له مه‌مله‌كه‌ت ميراتگر بوى و شوون باوگى گرت، يه‌يش له‌شوون مردن باوگى ئاڵاى سه‌رۆكايه‌تى هه‌ڵكرد، ئى بابلوله كه‌سيگ ئازا و زرنگ بوى، ئازايه‌تيه‌گه‌يشى ره‌سوێده راده‌يگ ك حه‌ز له رشانن خوين ژيرده‌سه‌يل خوه‌ى بوى، چه‌وپووشى و وه‌خشين له هه‌ڵه‌ى بويچگ و گه‌ورا نه‌ياشت، هه‌ر وه بوونه‌ى ئه‌وه‌يشه‌و هه‌ميشه كاروه‌ده‌سه‌يل وڵات دڵسه‌رد و دڵته‌نگ كردياد و ره‌نجانه‌يان.
چه‌ن جاريگيش مه‌ردم له‌دژى ده‌سكردنه راپه‌ڕين، ئمجا ئبراهيم به‌گ ناويگ ك وه‌زير بابلول بوى و پياويگ داناو زيره‌ك بوى، چاره‌سه‌ر كيشه‌ى ياخيبويه‌يل كردياد و مقه‌يه‌تى سه‌روه‌خوه‌يى بابلول كردياد له فه‌رمانڕه‌وايى. بابلول دوياى 44 ساڵ له فه‌رمانڕه‌وايى ماڵئاوايى يه‌كجارى له دونيا كرد و روێكرده دويا مه‌نزڵ خوه‌ێ.
عه‌لی نه‌قی ئه‌لحسه‌ينی
